ஜோசியர், மேனேஜர்… இப்போ தயாரிப்பாளர்… விஜய்யின் கடைசிப் பட தயாரிப்பாளருக்கு திடீர் அரசுப் பதவி… பின்னணியில் இருக்கும் 70,000 கோடி பின்னணி…!

தமிழக வெற்றிக் கழகத் தலைவரும், தமிழக முதல்வருமான விஜய் தலைமையிலான அரசு, கேவிஎன் ப்ரொடக்‌ஷன்ஸ் நிறுவனரான வெங்கட் கே.நாராயணாவை டெல்லியில் தமிழ்நாடு அரசின் சிறப்பு பிரதிநிதியாக நியமித்துள்ளது. இதற்கான அரசாணையை ஆளுநர் ராஜேந்திர அர்லேக்கர் வெளியிட்டுள்ளார். இன்றைய தேதியில் (ஜூன் 26) இருந்து ஓராண்டு காலத்திற்கு தற்காலிக அடிப்படையில் இந்த நியமனம் செய்யப்பட்டுள்ளது. முதல்வர் விஜய்யின் நெருங்கிய நண்பரான வெங்கட் கே.நாராயணா, பெங்களூருவைச் சேர்ந்த ஒரு முக்கிய தொழிலதிபர் ஆவார். அவர் சட்டப்படிப்பு முடித்து, சுமார் 70,000 கோடி ரூபாய் சொத்து மதிப்புள்ள நிறுவனத்தை வழிநடத்திய பெருமைக்குரியவர் என்பது குறிப்பிடத்தக்கது.

விஜய் திரையுலகில் இருந்து முழுமையாக விலகுவதற்கு முன்பாக நடித்த கடைசித் திரைப்படமான ‘ஜனநாயகன்’ (இயக்கம்: ஹெச். வினோத்) படத்தைத் தயாரித்தது இந்த கேவிஎன் நிறுவனம் தான். சென்சார் பிரச்சனைகளால் இப்படம் இன்னும் வெளியாகவில்லை என்றாலும், இதன் தயாரிப்பாளரான வெங்கட் நாராயணாவுடன் விஜய்க்குத் தொடக்கம் முதலே நல்லுறவு இருந்து வந்தது. நடந்து முடிந்த தேர்தலில் தவெக 108 இடங்களில் வென்ற போதிலும், பெரும்பான்மை கிடைக்காததால் ஆட்சி அமைப்பதில் சிக்கல் நீடித்தது. அப்போது ஆளுநரைச் சந்திக்க விஜய் சென்றபோது வெங்கட் நாராயணாவும் உடன் சென்றார். தற்போது அவருக்கு அரசுப் பொறுப்பு வழங்கப்பட்டிருப்பதால், இது ஏதேனும் அரசியல் “டீலிங்” காரணமாக இருக்குமோ என்ற சந்தேகமும் கேள்விகளும் மக்களிடையே எழுந்துள்ளன.

தவெக ஆட்சிப் பொறுப்பேற்ற பிறகு, அரசுப் பதவிகளுக்குச் செய்யப்படும் நியமனங்கள் தொடர்ந்து சர்ச்சையாகி வருகின்றன. முன்னதாக, முதல்வரின் தனிப்பட்ட ஜோதிடரான ரிக்கி ராதன் பண்டிட்டிற்கு முதல்வரின் தனிச்செயலாளர் பதவி வழங்கப்பட்டது பெரும் கண்டனங்களுக்கு உள்ளாகி, பின்னர் அந்த அரசாணை ரத்து செய்யப்பட்டது. அதன் தொடர்ச்சியாக, விஜய்யின் மேனேஜர் ஜெகதீஷ் பழனிசாமிக்கு அந்தப் பதவி வழங்கப்பட்டதும் மக்களிடையே அதிருப்தியை ஏற்படுத்தியது. இந்த வரிசையில், தற்போது ‘ஜனநாயகன்’ படத் தயாரிப்பாளருக்கும் டெல்லி சிறப்பு பிரதிநிதி பதவி வழங்கப்பட்டிருப்பது, அரசியல் வட்டாரத்திலும் பொதுமக்களிடையேயும் தற்போதைய பேசுபொருளாக மாறியுள்ளது.