பத்திரப்பதிவு முறையில் மாற்றம்… தமிழக அரசு போட்ட புது ரூல்ஸ்… இனி சார் பதிவாளர் அலுவலகங்களில் இது கட்டாயம்…!

தமிழ்நாடு முழுவதும் உள்ள சார் பதிவாளர் அலுவலகங்களுக்கு வரும் பொதுமக்களை அதிகாரிகள் நிற்க வைக்கக் கூடாது எனப் பதிவுத்துறை அதிரடி உத்தரவு ஒன்றை பிறப்பித்துள்ளது. தமிழக அரசு பத்திரப் பதிவுத்துறை மூலமாக ஆவணப் பதிவுகள், திருமணப் பதிவு மற்றும் வில்லங்கச் சான்றிதழ் நகல்கள் வழங்குதல் உள்ளிட்ட பல்வேறு முக்கியமான சேவைகளை மக்களுக்கு வழங்கி வருகிறது. இந்த சேவைகளைப் பெறுவதற்காகத் தமிழகம் முழுமையிலும் உள்ள 587 சார் பதிவாளர் அலுவலகங்களுக்குத் தினமும் ஆயிரக்கணக்கான பொதுமக்கள் வந்து செல்கின்றனர். இந்நிலையில், பொதுமக்களின் வசதியையும் அவர்களின் நன்மதிப்பையும் உறுதி செய்யும் வகையில் இந்த புதிய அதிரடி நடவடிக்கை மேற்கொள்ளப்பட்டுள்ளது.

பதிவுத்துறைத் தலைவர் அனைத்து மாவட்டப் பதிவாளர்களுக்கும் அனுப்பியுள்ள சுற்றறிக்கையின்படி, பொதுமக்கள் தங்களது கோரிக்கைகளைச் சார் பதிவாளரிடமோ அல்லது அங்கு பணிபுரியும் உதவியாளர்கள் மற்றும் இளநிலை உதவியாளர்களிடமோ சமர்ப்பிக்க வரும்போது, அவர்களின் மேஜைக்கு முன்பாக கண்டிப்பாக நாற்காலிகள் போடப்பட்டிருக்க வேண்டும். ஒவ்வொரு அதிகாரியின் மேஜைக்கு முன்னாலும் பொதுமக்களுக்காகக் குறைந்தபட்சம் 2 நாற்காலிகள் கண்டிப்பாகப் போடப்பட்டிருக்க வேண்டும் என்பதும், பொதுமக்களை நாற்காலியில் அமர வைத்துதான் சார்பதிவாளர்கள் மற்றும் ஊழியர்கள் பேச வேண்டும் என்பதும் கட்டாயமாக்கப்பட்டுள்ளது. எந்தவொரு சூழ்நிலையிலும், பொதுமக்கள் எவரையும் நிற்க வைத்துக்கொண்டு அதிகாரிகள் பதிலளிக்கக் கூடாது என்று அதில் மிகத் தெளிவாகக் குறிப்பிடப்பட்டுள்ளது.

இது தொடர்பாக ஏற்கனவே பல்வேறு உத்தரவுகளும், அறிவுரைகளும் ஆய்வுக் கூட்டங்களில் தொடர்ந்து வழங்கப்பட்டிருந்தாலும், தற்போது சிசிடிவி கேமராக்களை ஆய்வு செய்யும்போது அத்தகைய நடைமுறை பல அலுவலகங்களில் முறையாகப் பின்பற்றப்படவில்லை என்பது தெரியவந்துள்ளது. இந்த அலட்சியப் போக்கைக் கண்டிக்கும் வகையில், இனிவரும் காலங்களில் மாவட்டப் பதிவாளர் அலுவலகங்கள், துணைப் பதிவுத்துறைத் தலைவர் அலுவலகங்கள் மற்றும் பதிவுத்துறைத் தலைவர் அலுவலகத்தில் உள்ள சிசிடிவி கட்டுப்பாட்டு அறைகள் (CCTV Control Rooms) மூலம் அனைத்து சார் பதிவாளர் அலுவலகங்களும் தொடர்ந்து தீவிரமாகக் கண்காணிக்கப்படும் என்று தெரிவிக்கப்பட்டுள்ளது.

இந்த புதிய விதிமுறையையும் சுற்றறிக்கையில் கொடுக்கப்பட்டுள்ள அறிவுரைகளையும் மீறி, பொதுமக்களைத் தொடர்ந்து நிற்க வைக்கும் அதிகாரிகள் மீது சிசிடிவி கண்காணிப்பு மூலம் கடுமையான துறை ரீதியான ஒழுங்கு நடவடிக்கை எடுக்கப்படும் எனப் பதிவுத்துறை எச்சரித்துள்ளது. அரசின் இந்த அதிரடி மற்றும் கனிவான உத்தரவு பொதுமக்களிடையே பெரும் வரவேற்பைப் பெற்றுள்ளதுடன், அரசு அலுவலகங்களுக்கு வரும் தங்களுக்கு உரிய மரியாதையும் மனநிம்மதியும் கிடைக்கும் என்று பொதுமக்கள் மகிழ்ச்சி தெரிவித்துள்ளனர்.