“அம்மாவை பார்க்கணும்…” இறந்த அம்மாவை நினைத்து அழுத 16 வயது சிறுவன்…. தங்கையை டியூசனுக்கு அனுப்பி விட்டு விபரீத முடிவு… பெரும் சோகம்…!!

சென்னை, கொடுங்கையூரைச் சேர்ந்த உதயசங்கர் என்பவரின் 16 வயது மகன் திரூஸ், தனது தாயின் பிரிவைத் தாங்க முடியாமல் தற்கொலை செய்து கொண்ட சம்பவம் சோகத்தை ஏற்படுத்தியுள்ளது. திரூஸ், பெரம்பூரில் உள்ள தனியார் பள்ளியில் 11ஆம் வகுப்பு படித்து வந்ததுடன், சிலம்பம், கராத்தே போன்ற கலைகளில் தேர்ச்சி பெற்று தேசிய அளவில் பல பதக்கங்களைப் பெற்றுள்ளார்.

திரூஸின் தாயார் நிஷாந்தி, இரத்தப் புற்றுநோயால் பாதிக்கப்பட்டிருந்த நிலையில், கடந்த மாதம் அக்டோபர் 24ஆம் தேதி உயிரிழந்தார். அன்று முதல் திரூஸ் மிகுந்த சோகத்துடன் காணப்பட்டதுடன், அடிக்கடி தாயைப் பார்க்க வேண்டும் என்று தந்தையிடம் அழுதுள்ளார். சம்பவத்தன்று இரவு, திரூஸின் தந்தை பணிக்குச் சென்ற நிலையில், திரூஸ் தனது தங்கை ஹர்ஷிதாவை டியூசனுக்கு அனுப்பிவிட்டு வீட்டில் தனியாக இருந்துள்ளார். இரவு 9 மணிக்கு ஹர்ஷிதா திரும்பி வந்து கதவைத் தட்டியபோது, கதவு திறக்கப்படவில்லை.

பின்னர் அக்கம் பக்கத்தினர் கதவை உடைத்து உள்ளே சென்று பார்த்தபோது, திரூஸ் தனது தாயின் புடவையால் மின்விசிறியில் தூக்கிட்டு மயங்கிக் கிடந்ததைக் கண்டு அதிர்ச்சியடைந்தனர். மருத்துவப் பரிசோதனையில் அவர் இறந்துவிட்டது உறுதியானது.  இதுகுறித்து கொடுங்கையூர் காவல்துறையினர் வழக்குப் பதிவு செய்து விசாரணை நடத்தி வருகின்றனர்.