“துப்பாக்கிச் சூட்டை நிறுத்துங்கள்!”… இது போரின் முடிவல்ல… சிறு தவறு செய்தாலும் அவ்வளவு தான்”… அமெரிக்காவுக்கு ஈரான் விடுத்த பகீர் எச்சரிக்கை…!!!

மத்திய கிழக்கில் கடந்த ஒரு மாதமாக நீடித்து வந்த போர் பதற்றம், ஈரான் மற்றும் அமெரிக்கா இடையே ஏற்பட்டுள்ள இரண்டு வார காலத் தற்காலிகப் போர் நிறுத்த ஒப்பந்தத்தின் மூலம் ஒரு முக்கியத் திருப்புமுனையை எட்டியுள்ளது. கடந்த பிப்ரவரி 28-ஆம் தேதி ஈரான் மீது அமெரிக்கா மற்றும் இஸ்ரேல் நடத்திய கூட்டுத் தாக்குதலில், அந்நாட்டின் உச்ச தலைவர் அயதுல்லா காமேனி கொல்லப்பட்டதைத் தொடர்ந்து போர் தீவிரமடைந்தது. இதற்குப் பதிலடியாக ஈரான் நடத்திய தாக்குதல்களும், உலகின் மிக முக்கியமான எண்ணெய் போக்குவரத்துப் பாதையான ஹார்முஸ் ஜலசந்தியை மூடியதும் உலகளவில் கடும் எரிபொருள் நெருக்கடியை ஏற்படுத்தியது.

போர் உச்சக்கட்டத்தை எட்டிய நிலையில், ஈரானின் பொதுமக்கள் உள்கட்டமைப்புகள் மீது தாக்குதல் நடத்தப் போவதாகவும், “ஒரு முழு நாகரிகமே அழியப் போகிறது” என்றும் அமெரிக்க அதிபர் டிரம்ப் எச்சரிக்கை விடுத்திருந்தார். இருப்பினும், பாகிஸ்தானின் மத்தியஸ்தத்தால் ஏற்பட்ட அதிரடி திருப்பமாக, இரு நாடுகளும் ஏப்ரல் 10 அன்று இஸ்லாமாபாத்தில் பேச்சுவார்த்தை நடத்தச் சம்மதித்துள்ளன. இதன் ஒரு பகுதியாக, ஹார்முஸ் ஜலசந்தி வழியாக ஈரான் ராணுவ மேற்பார்வையுடன் கப்பல்கள் செல்லத் தற்காலிகமாக அனுமதி வழங்கப்பட்டுள்ளது.

மறைந்த அயதுல்லா காமேனியின் மகனும், ஈரானின் புதிய உச்ச தலைவருமான மொஜ்தபா கமேனி, அனைத்து ராணுவப் பிரிவுகளும் துப்பாக்கிச் சூட்டை உடனடியாக நிறுத்த வேண்டும் என்று உத்தரவிட்டுள்ளார். எனினும், இது போரின் முடிவல்ல என்றும், தற்காலிக இடைநிறுத்தம் மட்டுமே என்றும் தெஹ்ரான் நிர்வாகம் திட்டவட்டமாகத் தெரிவித்துள்ளது. “தங்கள் கைகள் இன்னும் துப்பாக்கியின் விசையின் மீதே இருப்பதாகவும், எதிரி சிறு தவறு செய்தாலும் முழு பலத்துடன் பதிலடி கொடுக்கப்படும்” என்றும் ஈரானின் உச்ச தேசிய பாதுகாப்பு கவுன்சில் எச்சரிக்கை விடுத்துள்ளது.

இந்தச் சூழலில், ஈரானின் புதிய உச்ச தலைவர் மொஜ்தபா கமேனி இதுவரை பொதுவெளியில் தோன்றாதது சர்வதேச அளவில் பல்வேறு ஐயங்களை ஏற்படுத்தியுள்ளது. அவர் அமெரிக்க-இஸ்ரேல் தாக்குதலில் படுகாயமடைந்து, கவலைக்கிடமான நிலையில் சிகிச்சை பெற்று வருவதாக மேற்கத்திய ஊடகங்கள் செய்திகளை வெளியிட்டு வருகின்றன. இருப்பினும், அமெரிக்கா பேச்சுவார்த்தைக்கு முன்வந்திருப்பதை ஈரான் தனது வெற்றியாகக் கொண்டாடி வரும் நிலையில், இஸ்லாமாபாத் பேச்சுவார்த்தையின் முடிவுகளே இப்பிராந்தியத்தின் அமைதியைத் தீர்மானிக்கும் காரணியாக இருக்கும்.