தமிழக சட்டமன்றத் தேர்தலை முன்னிட்டு திமுக தலைவரும் முதலமைச்சருமான மு.க.ஸ்டாலின் மாநிலம் முழுவதும் தீவிரப் பிரச்சாரம் மேற்கொண்டு வருகிறார். சிவகங்கை மாவட்டம் வையிரவன்பட்டியில் நடைபெற்ற பொதுக்கூட்டத்தில், நான்கு தொகுதி வேட்பாளர்களை ஆதரித்துப் பேசிய அவர், எடப்பாடி பழனிசாமி தோல்வி பயத்திலும் விரக்தியிலும் திமுகவை விமர்சித்து வருவதாகக் குறிப்பிட்டார். பின்னர் அவர் ராமநாதபுரம் மாவட்டம் பரமக்குடிக்குச் சென்று அங்குள்ள தனியார் விடுதியில் தங்கி ஓய்வெடுத்தார்.
பரமக்குடியில் செய்தியாளர்களைச் சந்தித்த முதலமைச்சரிடம் பல்வேறு கேள்விகள் எழுப்பப்பட்டன. அதிமுகவின் தேர்தல் வாக்குறுதிகள் குறித்துக் கேட்டபோது, தான் இன்னும் அவற்றைப் படிக்கவில்லை என்று பதிலளித்தார். மேலும், ‘ஜனநாயகன்’ திரைப்படம் இணையத்தில் கசிந்தது குறித்த கேள்விக்கு கருத்து தெரிவிக்க விரும்பவில்லை (No Comments) என்று அவர் சுருக்கமாகக் கூறினார்.
முன்பெல்லாம் திமுக – அதிமுக இடையேதான் போட்டி இருந்தது, இப்போது ஏன் தமிழ்நாடு மற்றும் டெல்லிக்கு இடையிலான போட்டி என்று கூறுகிறீர்கள் என்ற கேள்விக்கு அவர் விரிவான விளக்கமளித்தார். தற்போது அதிமுகவிற்கு முறையான தலைமை இல்லை என்றும், அக்கட்சி பாஜகவின் கட்டுப்பாட்டில் இயங்குவதாகவும் அவர் விமர்சித்தார். அதிமுக என்ற முகமூடியுடன் பாஜக தமிழ்நாட்டிற்குள் நுழைய முயற்சிப்பதால், இது தமிழ்நாட்டின் உரிமைக்கும் டெல்லிக்கும் இடையிலான போராட்டமாக மாறியுள்ளதாக அவர் தெரிவித்தார்.