விஜய் இல்லை என்றால் சினிமா நின்றுவிடாது… அதுதான் எதார்த்தம்.. பிரபல நடிகரின் ‘நச்’ கருத்து!

தமிழ் சினிமாவில் இன்றிருக்கும் மிகவும் பிரபலமான நடிகர்களில் ஒருவர் விஜய். தன்னுடைய புகழின் உச்சியில் இருக்கும் விஜய் ரஜினிகாந்தை விட அதிக சம்பளம் வாங்கும் தமிழ் நடிகர் என்ற சாதனையைப் படைத்துள்ளார். அதற்கேற்றார் போல அவரின் சுமாரான படங்கள் கூட நல்ல வசூலைப் பெற்று வருகின்றன.

தற்போது மாஸ் நடிகராக இருக்கும் விஜய், 90 களில் தனக்கான இடத்துக்காக போராடிக் கொண்டிருந்தார். இடையிடையே ஹிட் கொடுத்திருந்தாலும் அவருக்கென்று ஒரு நிலையான மார்க்கெட் கில்லி படத்துக்கு முன்பே உருவானது. அதனால் அதற்கு முந்தைய படங்களில் எல்லாம் தன்னுடைய படத்தில் துறைசார்ந்த பிரபலங்கள் இருக்க வேண்டும், அது படத்தின் பிஸ்னஸுக்கு உதவும் என விரும்புவார்.

அதே போல அவரை அடுத்த கட்டத்துக்கு உயர்த்திய திரைப்படம் என்றால் அது ஏ ஆர் முருகதாஸ் இயக்கத்தில் உருவான துப்பாக்கி திரைப்படம்தான். அந்த படம்தான் முதல் முதலில் விஜய் நடித்ததில் 100 கோடி ரூபாய் வசூல் செய்த படம் என்று சொல்லப்படுகிறது. அதன் பின்னர் விஜய்யின் மார்க்கெட் ஏறுமுகத்தில் சென்று இன்று இந்தியாவிலேயே அதிக சம்பளம் வாங்கும் நடிகராக உள்ளார்.

விஜய் தற்போது நடித்துவரும் ஜனநாயகன் படத்தோடு சினிமாவில் இருந்து விலகி, முழுநேர அரசியலில் ஈடுபடவுள்ளார். இந்நிலையில் பலரும் விஜய் சென்றுவிட்டால் அவரின் இடம் வெற்றிடமாகிவிடும் என புலம்பி வருகின்றனர். இந்நிலையில் நடிகர் சிங்கம்புலி இதுபற்றி பேசுகையில் “யார் இருந்தாலும் இல்லாவிட்டாலும் சினிமா இயங்கிக் கொண்டுதான் இருக்கும். யாராவது சினிமாவை நான் வென்றுவிட்டேன் என்று சொன்னால் அவர்கள் சினிமா தெரியாமல் பேசுகிறார்கள் என்றுதான் அர்த்தம். ஒருவர் சென்றால் மற்றொருவர் அந்த இடத்துக்கு வந்துவிடுவார். அதனால் சினிமாவில் வெற்றிடம் என்பது கிடையாது” எனக் கூறியுள்ளார்.