“டேட்டிங் ஆப்பில் ‘ஐ லவ் யூ’.. அடுத்த 3 மாதத்தில் நடந்த பயங்கரம்”.. வீடியோ காலில் மயக்கி 1.66 கோடியை சுருட்டிய மாயாவி… ஷாக்கில் பெங்களூரு…!

பெங்களூருவில் டேட்டிங் செயலி மூலம் மலர்ந்த காதலால், மென்பொருள் பொறியாளர் (சாப்ட்வேர் இன்ஜினீயர்) ஒருவர் ரூ.1.66 கோடி பணத்தை ஏமாந்துள்ள அதிர்ச்சி சம்பவம் ஒட்டுமொத்த ஐடி வட்டாரத்தையும் உலுக்கியுள்ளது. கர்நாடக மாநிலம் பெங்களூரு தென்கிழக்கு மண்டல போலீஸ் எல்லைக்கு உட்பட்ட பகுதியில் வசித்து வரும் சவுரப் துபே என்ற கம்ப்யூட்டர் என்ஜினீயர், அங்குள்ள ஒரு முன்னணி தனியார் நிறுவனத்தில் உயர் பதவியில் பணியாற்றி வருகிறார். இவருக்கு கடந்த பிப்ரவரி மாதம் மொபைலில் உள்ள பிரபல ‘டேட்டிங்’ செயலி மூலமாக ‘ரியா அகர்வால்’ என்ற இளம்பெண்ணின் அறிமுகம் கிடைத்துள்ளது. ஆரம்பத்தில் சாதாரணமாக தொடங்கிய இந்த பழக்கம், நாளடைவில் வாட்ஸ்-அப் வீடியோ கால்களில் பேசும் அளவுக்கு நெருக்கமான காதலாக மாறியுள்ளது.

ஒரு கட்டத்தில் ரியா, சவுரப்பை திருமணம் செய்து கொள்ள விருப்பம் தெரிவிக்க, வருங்கால மனைவி கிடைக்கப் போகும் மகிழ்ச்சியில் சவுரப்பும் அதற்கு உடனடியாக சம்மதம் தெரிவித்துள்ளார். இரு வீட்டாரும் திருமண ஏற்பாடுகளை முறைப்படி செய்யத் தொடங்கிய வேளையில், ரியா தனது சுயரூபத்தைக் காட்டி சவுரப்பிற்கு வலை வீசியுள்ளார். தான் ஆன்லைன் பங்கு வர்த்தகத்தில் (Online Share Trading) முதலீடு செய்து குறுகிய காலத்தில் அதிக லாபம் ஈட்டி வருவதாகக் கூறி, நாம் இருவரும் திருமணம் செய்து கொள்ளப் போவதால் சவுரப்பையும் இதில் பெருமளவு முதலீடு செய்யுமாறு ஆசையாக வற்புறுத்தியுள்ளார்.

மோசடியின் பின்னணி: தன்னைத் திருமணம் செய்யப் போகும் பெண் என்பதால், ரியாவின் பேச்சை முழுமையாக நம்பிய சவுரப், கடந்த பிப்ரவரி முதல் மே மாதம் வரையிலான வெறும் 3 மாத காலகட்டத்திலேயே, அவர் குறிப்பிட்ட பல்வேறு வங்கி கணக்குகளில் கொஞ்சம் கொஞ்சமாக மொத்தம் ரூ.1.66 கோடியைச் செலுத்தி முதலீடு செய்துள்ளார்.

சவுரப் முதலீடு செய்த அசலையும், அதற்கு வரும் லாபத்தையும் எப்போது வேண்டுமானாலும் எடுத்துக் கொள்ளலாம் என்று ரியா நம்ப வைத்திருந்த நிலையில், சவுரப்புக்கு அவசரமாகப் பணம் தேவைப்பட்டுள்ளது. இதையடுத்து அவர் சம்பந்தப்பட்ட வங்கி கணக்குகளில் இருந்து பணத்தை எடுக்க முயன்றபோது, அங்கிருந்த கணக்குகளில் வெறும் ரூ.4,250 மட்டுமே எஞ்சியிருந்தைக் கண்டு இடி விழுந்தது போல் அதிர்ச்சியடைந்தார். பதறிப்போன சவுரப் உடனடியாக தனது காதலி ரியாவைத் தொடர்பு கொள்ள முயன்றபோது, அவரது செல்போன் ஸ்விட்ச் ஆப் செய்யப்பட்டிருந்தது.

அப்போதுதான் டேட்டிங் ஆப் மூலம் திருமண ஆசை காட்டி, ரியா என்ற பெண் திட்டமிட்டு தன்னை ஏமாற்றி கோடிக்கணக்கான பணத்தைச் சுருட்டிக்கொண்டு எஸ்கேப் ஆகியிருப்பதை சவுரப் உணர்ந்தார். இதனால் நிலைகுலைந்து போன அவர், உடனடியாக பெங்களூரு தென்கிழக்கு மண்டல சைபர் கிரைம் போலீசில் பரபரப்பு புகார் அளித்துள்ளார். சவுரப் கொடுத்த புகாரின் பேரில் போலீசார் வழக்குப்பதிவு செய்து, பணத்துடன் தலைமறைவான அந்த மர்ம இளம்பெண்ணைத் தீவிரமாக வலைவீசி தேடி வருகிறார்கள். ஆன்லைன் மற்றும் டேட்டிங் செயலிகளில் பழகும் நபர்களிடம் எச்சரிக்கையாக இருக்க வேண்டும் என்பதற்கு இந்த சம்பவம் ஒரு முக்கிய எச்சரிக்கையாக அமைந்துள்ளது.