மத்தியப் பிரதேச மாநிலம் உஜ்ஜைனில் உள்ள சக்ரதீர்த்த சுடுகாட்டில் அரங்கேறியதாகக் கூறப்படும் ஒரு அதிர்ச்சியூட்டும் காணொளி சமூக வலைதளங்களில் பெரும் பரபரப்பை ஏற்படுத்தியுள்ளது. சுடுகாட்டின் நடுவே எரியும் சிதைக்கு அருகில், திருநங்கை அகோரி ஒருவர் கையில் வாளுடன் தாந்திரீகச் சடங்கில் ஈடுபட்டுள்ளார். பொதுமக்களைப் பதறவைக்கும் வகையில், எரியும் சிதையிலிருந்து மனித எஞ்சிய பகுதிகளை வெளியே எடுத்து அவர் சாப்பிட்டதாகக் கூறப்படும் இந்தக் காட்சியைக் கண்டு அங்கிருந்தவர்கள் அதிர்ச்சியில் உறைந்து போயினர்.
இந்தச் சம்பவம் அப்பகுதியில் பெரும் கொந்தளிப்பை ஏற்படுத்தியுள்ள நிலையில், சமூக ஊடகங்களில் இந்தக் காணொளி வைரலாகி கடுமையான விவாதங்களை உருவாக்கியுள்ளது. அகோரி வழிபாட்டு முறைகளின் பெயரால் பொதுவெளியில் நாகரிகமற்ற மற்றும் மனிதநேயமற்ற முறைகளில் இதுபோன்ற செயல்களில் ஈடுபடுவது எந்த வகையிலும் ஏற்றுக்கொள்ள முடியாது என்று பலரும் சமூக வலைதளங்களில் தங்களது கடும் கண்டனங்களைப் பதிவு செய்து வருகின்றனர்.
இதற்கிடையே, துறவிகள் சமூகத்தினரும் ஆன்மீகப் பெரியோர்களும் இந்தச் சம்பவத்திற்குத் தங்களது எதிர்ப்பைத் தெரிவித்துள்ளனர். உண்மையான அகோரி மற்றும் துறவிகளுக்கும், சடங்குகளின் பெயரால் இத்தகைய போலிச் செயல்களில் ஈடுபடும் நபர்களுக்கும் எந்தத் தொடர்பும் இல்லை என்று அவர்கள் திட்டவட்டமாகத் தெரிவித்துள்ளனர். சனாதன தர்மத்தின் புனிதத் தன்மையைக் களங்கப்படுத்தும் இதுபோன்ற நயவஞ்சகர்களின் மீது உள்ளூர் நிர்வாகம் உடனடியாகத் கடுமையான சட்ட நடவடிக்கை எடுக்க வேண்டும் என்றும் துறவிகள் சங்கம் கோரிக்கை விடுத்துள்ளது.