சென்னை தாம்பரத்தில் பட்டப்பகலில் இளம்பெண் ஒருவருக்கு நேர்ந்த பாலியல் அத்துமீறலும், அதற்கு அவர் காட்டிய துணிச்சலான எதிர்வினையும் அப்பகுதியில் பெரும் பரபரப்பை ஏற்படுத்தியுள்ளது. தனது தாயுடன் சாலையில் நடந்து சென்ற அந்தப் பெண்ணிடம், 50 வயதான தங்கதுரை என்பவர் மதுபோதையில் தகாத முறையில் நடந்து கொண்டுள்ளார். இதனால் கடும் கோபமடைந்த அந்தப் பெண், சிறிதும் தயங்காமல் அந்த நபரின் சட்டையைப் பிடித்து இழுத்து மக்கள் மத்தியிலேயே சரமாரியாகத் தாக்கி தனது எதிர்ப்பைப் பதிவு செய்தார்.
தாக்குதலின் போது, “உன் வீட்டில் ஒரு பெண் இருந்தால் இப்படித்தான் செய்வாயா?” என்று அவர் ஆவேசமாகக் கேட்ட கேள்வி அங்கிருந்தோரைச் சிந்திக்க வைத்தது. அங்கிருந்த பொதுமக்களின் உதவியுடன் அந்த நபர் பிடிக்கப்பட்டு, உடனடியாக காவல் நிலையத்தில் ஒப்படைக்கப்பட்டார். போதை ஆசாமியின் அத்துமீறலுக்கு அஞ்சாமல், துணிச்சலுடன் பாடம் புகட்டிய அந்த இளம்பெண்ணின் செயலை சமூக வலைதளங்களில் பலரும் பாராட்டி வருகின்றனர்.