சென்னை மாநகராட்சியில் குப்பைகளைத் தரம் பிரித்து வழங்காவிட்டால் கடுமையான அபராதம் விதிக்கப்படும் என மாநகராட்சி ஆணையர் டாக்டர்.சமீரன் எச்சரிக்கை விடுத்துள்ளார். ரிப்பன் மாளிகையில் நடைபெற்ற திடக்கழிவு மேலாண்மை தொடர்பான ஆலோசனைக் கூட்டத்திற்குத் தலைமை தாங்கிய அவர், துணை ஆணையர் சித்ரா விஜயன் உள்ளிட்ட அதிகாரிகளுடன் பணிகளின் முன்னேற்றம் குறித்து விரிவாக விவாதித்தார். சென்னை நகரின் தூய்மையைப் பராமரிக்கவும் திடக்கழிவுகளை முறையாகக் கையாளவும் புதிய வழிமுறைகளை உடனடியாகச் செயல்படுத்த அதிகாரிகளுக்கு உத்தரவிடப்பட்டுள்ளது.
பெருஅளவில் குப்பைகளை உருவாக்கும் நிறுவனங்கள் மற்றும் அமைப்புகள், தங்களின் வளாகத்திலேயே மக்கும் குப்பை, மக்காத குப்பை, சுகாதாரக் கழிவுகள் மற்றும் அபாயகரமான கழிவுகள் என நான்கு வகையாகத் தனித்தனியாகப் பிரித்து வழங்க வேண்டும். வரும் செப்டம்பர் 1-ஆம் தேதி முதல் இவிதிமுறையைக் கட்டாயமாகப் பின்பற்ற வேண்டும் என்றும், மீறுபவர்கள் மீது உரிய அபராதம் விதிக்கப்படும் என்றும் ஆணையர் தெரிவித்துள்ளார். இதற்காகக் பிரத்யேகப் பொறுப்பு அலுவலர்கள் நியமிக்கப்பட்டு, தீவிர கண்காணிப்புப் பணிகள் மேற்கொள்ளப்பட்டு வருகின்றன.
வீடுகள்தோறும் குப்பைகளைத் தரம் பிரித்து வழங்கும் விழிப்புணர்வுப் பிரசாரங்கள் ஏற்கனவே தெற்கு வட்டாரப் பகுதிகளில் தொடங்கப்பட்டுள்ளன. விரைவில் வடக்கு மற்றும் மத்திய வட்டாரப் பகுதிகளிலும் இத்தகைய வீடு வீடான விழிப்புணர்வுப் பணிகள் விரிவுபடுத்தப்பட உள்ளன. பொதுமக்கள் தங்கள் வீடுகளிலேயே குப்பைகளைத் தரம் பிரித்து வழங்குவதை உறுதி செய்வதே இதன் முதன்மை நோக்கமாகும்.
நகரின் முக்கிய குப்பைக் கிடங்குகளில் ‘பயோ-மைனிங்’ (உயிரி அகழ்ந்தெடுத்தல்) முறையில் குப்பைகளை அகற்றும் பணிகள் விரைவுபடுத்தப்பட்டுள்ளன. பெருங்குடியில் முதற்கட்டமாக 94 ஏக்கர் நிலம் மீட்கப்பட்ட நிலையில், இரண்டாம் கட்டமாக 5.50 லட்சம் மெட்ரிக் டன் குப்பைகளில் 28,000 மெட்ரிக் டன் அகற்றப்பட்டுள்ளது. அதேபோல், கொடுங்கையூரில் 66 லட்சம் மெட்ரிக் டன் குப்பைகளில் இதுவரை 44 லட்சம் மெட்ரிக் டன் அகற்றப்பட்டு 16 ஏக்கர் நிலம் மீட்கப்பட்டுள்ளது. அத்திப்பட்டு கிடங்கிலும் இரண்டாம் கட்டப் பணிகள் தீவிரமாக நடந்து வரும் நிலையில், அனைத்து மண்டலங்களிலும் திடக்கழிவு மேலாண்மைப் பணிகளை அதிகாரிகள் தொடர்ந்து கண்காணிக்க ஆணையர் அறிவுறுத்தியுள்ளார்.