மும்பை-பூனே அதிவேக நெடுஞ்சாலையில் பயணித்த டொயோட்டா ஃபார்ச்சூனர் ரக சொகுசு கார் ஒன்றின் பதிவு எண் சில விநாடிகளில் மறையும் காட்சி சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது. அந்த காரில் பொருத்தப்பட்டிருந்த சிறப்புச் சாதனம் மூலம், அதன் நம்பர் பிளேட்டை ஒரு கருப்பு நிறத் திரை தானாகவே மறைப்பது போன்ற காட்சிகள் அந்த வீடியோவில் பதிவாகியுள்ளன.
இந்த வீடியோ இணையத்தில் வைரலானதைத் தொடர்ந்து, அந்த வாகனத்தின் பின்னணி குறித்து ஆய்வு செய்யப்பட்டதில் பல்வேறு அதிர்ச்சி தகவல்கள் வெளியாகின. அந்த குறிப்பிட்ட காரின் மீது அதிவேகமாக வாகனம் ஓட்டுதல், அபாயகரமான முறையில் காரைச் செலுத்துதல் உள்ளிட்ட போக்குவரத்து விதிகளை மீறியதற்காக 55-க்கும் மேற்பட்ட நிலுவைச் சலான் வழக்குகள் உள்ளன.
இதற்கான நிலுவை அபராதத் தொகை மட்டும் ரூ 1 லட்சத்திற்கும் அதிகமாகும். கேமராக்கள் மற்றும் போக்குவரத்து காவல்துறையினரின் தானியங்கி கண்காணிப்பு அமைப்பில் இருந்து தப்பிப்பதற்காகவே இத்தகைய சட்டவிரோதச் சாதனத்தைப் பயன்படுத்தியதாகக் கூறப்படுகிறது. இந்தச் சம்பவம் குறித்து விசாரணை நடத்தி, அந்த வாகனத்தின் உரிமையாளர் மீது கடுமையான நடவடிக்கை எடுக்க வேண்டும் என்ற கோரிக்கை தீவிரமடைந்துள்ளது.