பள்ளியா அல்லது சித்திரவதைக்கூடமா?… வாந்தி எடுத்த 3 வயது குழந்தைக்கு நரக வேதனை காட்டிய பள்ளி நிர்வாகம்… மதுராவில் அரங்கேறிய நெஞ்சை பதறவைக்கும் சம்பவம்…!!!

உத்தரப் பிரதேச மாநிலம் மதுராவின் கோவிந்த் நகர் காவல் நிலைய எல்லைக்குட்பட்ட பாலாஜி மெமோரியல் பப்ளிக் பள்ளியில், மூன்று வயது சிறுமியிடமும் அவரது தாயாரிடமும் பள்ளி நிர்வாகம் மனிதாபிமானமற்ற முறையில் நடந்துகொண்ட வெட்கக்கேடான சம்பவம் வெளிச்சத்திற்கு வந்துள்ளது. கடந்த மே 8 ஆம் தேதி காலையில், நர்சரி வகுப்பில் படித்து வரும் அந்த மூன்று வயது சிறுமிக்கு திடீரென உடல்நலக் குறைவு ஏற்பட்டு வகுப்பறையிலேயே வாந்தி எடுத்துள்ளார். அந்த இக்கட்டான சூழ்நிலையில், சிறுமிக்கு முதலுதவி அளித்து ஆறுதல் கூறுவதற்குப் பதிலாக, பள்ளி நிர்வாகத்தினர் அந்தப் பிஞ்சு குழந்தையைக் கடுமையாகத் திட்டி, இரண்டு மணி நேரம் கைகளைக் தூக்கியபடி நிற்க வைத்து கொடூரமான தண்டனை வழங்கியுள்ளனர்.

அதன் பின்னர், அந்தச் சிறுமியின் தாயார் பிரியங்காவிற்குப் பள்ளி தரப்பிலிருந்து தகவல் கொடுக்கப்பட்டுள்ளது. பதற்றத்துடன் பள்ளிக்கு ஓடிவந்த தாயைக் கண்டதும் பள்ளி நிர்வாகம் அவரிடம் ஒரு துணியைக் கொடுத்து, சிறுமி வாந்தி எடுத்த தரைப்பகுதி முழுவதையும் துடைத்துச் சுத்தம் செய்யுமாறு கட்டாயப்படுத்தியுள்ளது. இதைக் கண்டு அதிர்ச்சியடைந்த அந்தத் தாய், முதலில் தனது குழந்தைக்குக் குடிக்கத் தண்ணீர் கொடுத்துவிட்டு, வேறு வழியின்றி பள்ளியின் தரையைத் துடைத்துச் சுத்தம் செய்துள்ளார். தரை முழுவதும் துடைக்கப்பட்ட பின்னரே, அந்தச் சிறுமியும் அவளது தாயும் வீட்டிற்குப் போக பள்ளி நிர்வாகம் அனுமதித்துள்ளது.

மனிதாபிமானத்தை உலுக்கிய இந்த விவகாரம் குறித்துத் தகவல் அறிந்த ஏபிவிபி (ABVP) அமைப்பைச் சேர்ந்த ஆர்வலர்கள் பள்ளியை முற்றுகையிட்டுப் பெரும் போராட்டத்தில் ஈடுபட்டனர். நிலைமை விபரீதமானதைத் தொடர்ந்து, கோவிந்த் நகர் காவல் நிலையப் பொறுப்பாளர் ரவி தியாகி தலைமையிலான போலீசார் சம்பவ இடத்திற்கு விரைந்து வந்தனர். காவல்துறை முன்னிலையில் பள்ளி நிர்வாகம், போராட்டக்காரர்கள் மற்றும் சிறுமியின் குடும்பத்தினருக்கு இடையே நீண்ட விவாதம் நடைபெற்றது. இறுதியாக, இச்சம்பவம் நடந்து ஆறு நாட்களுக்குப் பிறகு, பள்ளி மேலாளர் திலீப் குமார் சிங் தான் தவறு செய்துவிட்டதாக ஒப்புக்கொண்டு, இனிவரும் காலங்களில் இதுபோன்ற முறைகேடுகள் நடக்காது என எழுத்துப்பூர்வமாக மன்னிப்புக் கடிதம் அளித்துள்ளார்.