தமிழக அரசியலில் ஆட்சி அமைப்பதில் நிலவும் இழுபறிக்கு நடுவே, தவெக தலைவர் விஜய்க்கு வழங்கப்பட்ட கான்வாய் பாதுகாப்பு திடீரென விலக்கப்பட்டது அக்கட்சியினர் மத்தியில் பெரும் அதிர்ச்சியை ஏற்படுத்தியுள்ளது. தேர்தல் முடிவுகள் வெளியாகி, 108 இடங்களுடன் தனிப்பெரும் கட்சியாக தவெக உருவெடுத்த நிலையில், கடந்த மூன்று நாட்களாக விஜய்க்கு முதலமைச்சருக்கு இணையான பாதுகாப்பு வழங்கப்பட்டு வந்தது. ஆனால், நேற்று இரவு அவர் அலுவலகத்தில் இருந்து வீடு திரும்பும்போது அந்த சிறப்பு வாகனங்கள் திரும்பப் பெறப்பட்டது, அரசியல் வட்டாரத்தில் பல்வேறு யூகங்களை கிளப்பியது.
குறிப்பாக, திமுக – அதிமுக கூட்டணி அமைக்கப் போவதாகப் பரவி வரும் வதந்திகளும், ஆளுநர் இதுவரை விஜய்யை ஆட்சி அமைக்க அழைக்காததும் தவெக தொண்டர்களை அரண்டு போகச் செய்துள்ளது. தங்களுக்குப் பெரும்பான்மை கிடைக்காமல் தடுக்கச் சதி நடப்பதாக அவர்கள் அஞ்சிய வேளையில், இந்த பாதுகாப்பு விலகல் அந்த அச்சத்தை மேலும் அதிகரித்தது. 113 எம்.எல்.ஏ-க்களின் ஆதரவுடன் (காங்கிரஸ் உட்பட) இன்னும் 5 இடங்களுக்காகத் தவெக போராடி வரும் சூழலில், இந்தச் சம்பவம் பெரும் அரசியல் பின்னடைவாகப் பார்க்கப்பட்டது.
இருப்பினும், கான்வாய் பாதுகாப்பு விலக்கப்பட்டதற்குப் பின்னால் ஒரு நிர்வாக ரீதியான காரணம் இருப்பதாகத் தகவல் வெளியாகியுள்ளது. விஜய் இன்னும் முறைப்படி முதலமைச்சராகப் பதவியேற்காத நிலையில், அவருக்கு எப்படி இத்தகைய சிறப்புப் பாதுகாப்பு வழங்கப்படலாம் என ஆளுநர் ஆர்.என். ரவி அதிகாரிகளிடம் கேள்வி எழுப்பியதாகக் கூறப்படுகிறது. இதன் காரணமாகவே, விதிமுறைகளைப் பின்பற்றி அந்த வாகனங்கள் திரும்பப் பெறப்பட்டதாகவும், அவர் பதவியேற்ற பிறகு மீண்டும் அந்த பாதுகாப்பு வழங்கப்படும் என்றும் விளக்கமளிக்கப்பட்டுள்ளது.
இந்தச் சம்பவம் ஒருபுறம் இருக்க, திமுக – அதிமுக கூட்டணி ஆட்சி குறித்த வதந்திகள் இணையத்தில் தீயாகப் பரவி வருகின்றன. ஒருவேளை இத்தகைய கூட்டணி அமைந்தால், அது தவெக-வின் அரசியல் எதிர்காலத்தைப் பாதிக்கும் என்பதால் தவெகவினர் மிகுந்த கவலையில் உள்ளனர். ஆனால், ஆளுநர் கேட்ட 118 எம்.எல்.ஏ-க்களின் ஆதரவு பட்டியலைத் தயார் செய்வதில் விஜய் தீவிரமாக இருப்பதால், அடுத்த சில நாட்களில் தமிழக அரசியலில் ஒரு தெளிவான முடிவு எட்டப்படும் என எதிர்பார்க்கப்படுகிறது.