பிரபல நடிகையும், ஆந்திர மாநில முன்னாள் அமைச்சருமான ரோஜா, தான் அரசியலில் இருந்து விலகப் போவதாக பரவி வரும் வதந்திகளுக்கு அதிரடியாக முற்றுப்புள்ளி வைத்துள்ளார். ஆந்திர மாநில அரசைத் தான் கடுமையாக விமர்சிக்கும் போதெல்லாம், தம்மைக் கைது செய்யப் போவதாக திட்டமிட்டு செய்திகள் பரப்பப்படுவதாக அவர் குற்றம் சாட்டியுள்ளார். எதையும் எதிர்கொள்ளும் துணிச்சலுடன் தான் அரசியலுக்கு வந்ததாகவும், கைது நடவடிக்கைக்கு அஞ்சி ஒருபோதும் அரசியலை விட்டு விலக மாட்டேன் என்றும் அவர் உறுதியுடன் தெரிவித்துள்ளார். நான் ஒருபோதும் பயந்து ஓடவோ, விலகவோ மாட்டேன். நான் ஒரு பெண் என்பதால் விமர்சனம் செய்கிறார்கள் என்று கூறினார்.
தான் மீண்டும் திரைப்படங்கள் மற்றும் தொலைக்காட்சி நிகழ்ச்சிகளில் பங்கேற்பது குறித்து எழும் விமர்சனங்களுக்கும் ரோஜா விரிவான விளக்கமளித்துள்ளார். தான் அமைச்சராக இருந்த காலகட்டத்தில் நடிப்பைத் தவிர்த்ததாகவும், தற்போது கட்சிப் பதவியில் மட்டுமே நீடிப்பதால் மீண்டும் கலைத்துறையில் பணியாற்றுவதில் எந்தத் தவறும் இல்லை என்றும் அவர் குறிப்பிட்டுள்ளார். வாழ்வாதாரத்திற்காகத் தொழில் செய்வதில் பிழையில்லை என்பதை அவர் தனது பேட்டியின் மூலம் தெளிவுபடுத்தியுள்ளார்.
இந்த விவகாரத்தில் ஆந்திர துணை முதலமைச்சர் பவன் கல்யாணைச் சுட்டிக்காட்டி அவர் ஒரு முக்கியக் கேள்வியை எழுப்பியுள்ளார். அரசியலில் இருந்துகொண்டே பவன் கல்யாண் திரைப்படங்களில் நடிக்கும்போது யாரும் கேள்வி எழுப்புவதில்லை என்றும், தான் ஒரு பெண் என்பதால் மட்டுமே இதுபோன்ற விமர்சனங்கள் முன்வைக்கப்படுவதாகவும் அவர் வேதனை தெரிவித்துள்ளார். பாலினப் பாகுபாடு காரணமாகவே தன் மீது இத்தகைய வதந்திகள் பரப்பப்படுவதாகக் கூறியுள்ள ரோஜா, தனது அரசியல் பயணம் தொடரும் என்பதையும் ஆணித்தரமாகப் பதிவு செய்துள்ளார்.