தமிழகத்தில் 2026 சட்டமன்றத் தேர்தலை ஒட்டி நிலவி வந்த அரசியல் யூகங்களுக்கு முற்றுப்புள்ளி வைக்கும் விதமாக, தமிழக வெற்றிக் கழகத்துடன் கூட்டணி இல்லை என்பதை காங்கிரஸ் தலைமை உறுதி செய்துள்ளதாகத் தகவல்கள் வெளியாகியுள்ளன. டெல்லியில் நடைபெற்ற காங்கிரஸ் மேலிடக் கூட்டத்தில், தற்போதுள்ள திமுக கூட்டணியிலேயே தொடர்ந்து பயணிக்க ஒருமனதாக முடிவு எடுக்கப்பட்டுள்ளது. காங்கிரஸ் மற்றும் தவெக இடையே ரகசியப் பேச்சுவார்த்தைகள் நடைபெற்று வருவதாகப் பரவிய வதந்திகளுக்கு இந்த முடிவு முற்றுப்புள்ளி வைத்துள்ளது.
இந்த ஆலோசனைக் கூட்டத்தில் பங்கேற்ற தமிழக காங்கிரஸ் தலைவர்கள், திமுக கூட்டணியில் நீடிக்கவே விருப்பம் தெரிவித்துள்ளனர். தமிழகத்தின் தற்போதைய அரசியல் சூழலில் திமுக கூட்டணியே வலுவானதாக இருப்பதாகவும், தொகுதிப் பங்கீடு உள்ளிட்ட அம்சங்களில் சுமுகமான முடிவு எட்டப்படும் என்றும் அவர்கள் மேலிடத்திடம் வலியுறுத்தியுள்ளனர். இதன் மூலம், வரும் 2026 தேர்தலிலும் திமுக – காங்கிரஸ் கூட்டணி தொடர்வது கிட்டத்தட்ட உறுதியாகியுள்ளது.