அதிமுக முன்னாள் அமைச்சரும் மூத்த தலைவருமான செம்மலை, தாராபுரத்தில் இன்று நடைபெறவுள்ள நிகழ்ச்சியில் தமிழக வெற்றிக் கழகத்தின் தலைவர் விஜய் முன்னிலையில் அக்கட்சியில் இணைய உள்ளதாகத் தகவல்கள் வெளியாகியுள்ளன. கடந்த சட்டமன்றத் தேர்தலுக்குப் பிறகு அதிமுகவில் ஏற்பட்ட உட்கட்சிப் பிளவுகள் மற்றும் கருத்து வேறுபாடுகள் காரணமாக, அவர் கடந்த மே மாதம் அதிமுகவின் அடிப்படை உறுப்பினர் பொறுப்பிலிருந்து விலகினார். நீண்ட அரசியல் அனுபவம் கொண்ட செம்மலையின் இந்த முடிவு, தமிழக அரசியல் வட்டாரத்தில், குறிப்பாகக் கொங்கு மண்டலத்தில் பெரும் கவனத்தைப் பெற்றுள்ளது.
தற்போதைய தகவல்களின்படி, முன்னாள் அமைச்சர் கே.ஏ. செங்கோட்டையனின் ஏற்பாட்டின் பேரிலேயே செம்மலை தவெகவில் இணைய உள்ளதாகக் கூறப்படுகிறது. இவர் தவெகவில் இணைந்தால், கொங்கு மண்டலத்திலிருந்து அக்கட்சியில் தங்களை இணைத்துக் கொள்ளும் 5-வது முன்னாள் அமைச்சர் இவர் என்பது குறிப்பிடத்தக்கது. அடுத்தடுத்து மூத்த தலைவர்கள் தவெகவில் இணைந்து வருவது, எதிர்வரும் தேர்தலுக்குத் தயார் நிலையை நோக்கி நகரும் தமிழக வெற்றிக் கழகத்திற்கு மேலும் பலத்தையும், கொங்கு மண்டலத்தில் வலுவான அரசியல் அடித்தளத்தையும் வழங்கும் என எதிர்பார்க்கப்படுகிறது.