ரேஷன் கடை நேரம் மாறுகிறதா?… கூட்டுறவுத் துறையின் அதிரடி மூவ்… பின்னணி என்ன?…

சென்னை மற்றும் காஞ்சிபுரம் மாவட்டங்களில் ரேஷன் கடைகளின் வேலை நேரத்தை மாற்றியமைப்பது குறித்து கள ஆய்வு செய்து அறிக்கை சமர்ப்பிக்க கூட்டுறவுத்துறை உத்தரவிட்டுள்ளது. தற்போது சில மாவட்டங்களில் காலை 8:30 மணி முதல் இரவு 7 மணி வரை நீண்ட நேரம் கடைகள் செயல்படுவதால், ஊழியர்கள் கடுமையான பணிச்சுமைக்கும் மன உளைச்சலுக்கும் ஆளாவதாகப் புகார்கள் எழுந்தன. இதன் காரணமாக, பொதுமக்களின் அத்தியாவசியத் தேவைகளைப் பாதிப்பில்லாமல் பூர்த்தி செய்யும் அதே வேளையில், பணியாளர்களின் நலனையும் கருத்தில் கொண்டு இந்த நடவடிக்கை மேற்கொள்ளப்பட்டு வருகிறது.

ஊழியர் சங்கங்கள் தரப்பில் கடைகளின் நேரத்தைக் காலை 9 மணி முதல் மாலை 6 மணி வரை முறைப்படுத்த வேண்டும் என்றும், ஞாயிற்றுக்கிழமைகளில் வாராந்திர விடுமுறை அளிக்க வேண்டும் என்றும் தொடர்ச்சியாகக் கோரிக்கைகள் முன்வைக்கப்பட்டு வருகின்றன. கூட்டுறவுத்துறையின் இந்த ஆய்வறிக்கையின் அடிப்படையில், ஊழியர்களின் கோரிக்கைகள் பரிசீலிக்கப்பட்டு விரைவில் ரேஷன் கடைகளுக்கான புதிய மற்றும் சீரான நேர அட்டவணை அதிகாரப்பூர்வமாக வெளியாகும் என எதிர்பார்க்கப்படுகிறது.