தமிழகம் மட்டுமின்றி இந்தியா முழுவதும் உள்ள ஏழை எளிய மக்களுக்கு நியாய விலைக்கடைகள் மூலம் அரிசி, கோதுமை உள்ளிட்ட அத்தியாவசியப் பொருட்கள் குறைந்த விலையில் வழங்கப்பட்டு வருகின்றன. இந்நிலையில், நாட்டின் ரேஷன் விநியோக முறையை மேம்படுத்தவும், மக்களுக்கு எளிதாகப் பொருட்கள் கிடைக்கவும் மத்திய அரசு ‘ஒரே நாடு ஒரே ரேஷன் கார்டு’ திட்டத்தை தீவிரமாக அமல்படுத்தி வருகிறது. பொது விநியோகத் திட்டத்தில் கொண்டு வரப்பட்டுள்ள இந்த புரட்சிகரமான மாற்றத்தின் மூலம், இனி பொதுமக்கள் தங்களின் கோட்டாவிற்குரிய உணவு தானியங்களைப் பெற ஒரே ஒரு குறிப்பிட்ட கடையையோ அல்லது டீலரையோ நம்பி இருக்க வேண்டிய அவசியமில்லை.
மத்திய அரசின் இந்த புதிய மற்றும் ஹைடெக் வசதியின் கீழ், பயனாளிகள் தங்கள் விருப்பப்படி நாட்டின் எந்தவொரு அங்கீகரிக்கப்பட்ட நியாயவிலைக் கடைக்கும் சென்று தங்களுக்குரிய பொருட்களை எந்தவிதப் பிரச்சனையும் இல்லாமல் பெற்றுக் கொள்ளலாம். இத்திட்டத்தை வங்கி ஏடிஎம் (ATM) நெட்வொர்க்குடன் மத்திய அரசு ஒப்பிட்டுள்ளது. ஒரு வங்கி வாடிக்கையாளர் நாட்டின் எந்தப் பகுதியில் உள்ள ஏடிஎம்மிலும் பணம் எடுக்க முடிவதைப் போல, ரேஷன் கார்டுதாரர்களும் நாட்டின் எந்தவொரு அரசு ரேஷன் கடையிலும் தங்களுக்குரிய தானியங்களைப் பெறலாம். ஒரு கடையில் தொழில்நுட்பக் கோளாறு ஏற்பட்டாலோ அல்லது பொருட்கள் தீர்ந்துவிட்டாலோ, உடனடியாக வேறொரு கடைக்கு மாறிக்கொள்ளும் நெகிழ்வுத்தன்மையும் இதில் வழங்கப்பட்டுள்ளது.
இதுவரை பொதுமக்கள் ரேஷன் வாங்கும்போது பயோமெட்ரிக் சரிபார்ப்புச் சிக்கல்கள், கடைக்காரர்கள் ‘சரக்கு இல்லை’ என்று சாக்குப்போக்கு கூறுவது, மற்றும் கடை மூடப்பட்டிருப்பது போன்ற பல இன்னல்களுக்கு ஆளாகி வந்தனர். ஆனால், இந்த புதிய முறையின் மூலம் பயனாளிகள் தங்களுக்கு அருகிலுள்ள எந்தக் கடைக்கும் செல்லலாம் என்பதால், நேர விரயம் தவிர்க்கப்படுவதோடு, ரேஷன் கடைக்காரர்களின் தன்னிச்சையான போக்கிற்கும் முறைகேடுகளுக்கும் முற்றுப்புள்ளி வைக்கப்படும். மேலும், ஒரு கடையில் கோதுமையையும், மற்றொரு கடையில் அரிசியையும் கூட பிரித்து வாங்கிக் கொள்ளும் கூடுதல் சிறப்பம்சமும் இதில் உள்ளது.
இந்தத் திட்டம் குறிப்பாக வாழ்வாதாரத்திற்காகப் பல்வேறு மாநிலங்களுக்கும் மாவட்டங்களுக்கும் இடம்பெயரும் புலம்பெயர் தொழிலாளர்களின் குடும்பங்களுக்கு மிகப்பெரிய வரப்பிரசாதமாக அமைந்துள்ளது. இனி அவர்கள் ரேஷன் வாங்குவதற்காகத் தங்கள் சொந்த கிராமங்களுக்குச் செல்ல வேண்டியதில்லை; தற்சமயம் வசிக்கும் இடத்திலிருந்தே பொருட்களைப் பெற்றுக்கொள்ளலாம். பயோமெட்ரிக் தொழில்நுட்பத்தின் வலுவான கட்டமைப்பு மூலம் இந்தச் செயல்முறை முற்றிலும் பாதுகாப்பானதாகவும், முறைகேடுகள் இல்லாதவாறும் வடிவமைக்கப்பட்டுள்ளதால், தகுதியான பயனாளிகளுக்கு அரசு வழங்கும் நிவாரணங்கள் தடையின்றிச் சென்றடைவது உறுதி செய்யப்பட்டுள்ளது.