“அரசு மருத்துவமனை படுக்கையில் ரத்தக் களம்”…. தூங்கிக் கொண்டிருந்த மூதாட்டியைக் கொடூரமாகக் கடித்த எலி… திருச்சியை நள்ளிரவில் உலுக்கிய சம்பவம்….!

திருச்சி அரசு தலைமை மருத்துவமனையில் சிகிச்சை பெற்று வந்த மூதாட்டியை அதிகாலையில் எலி கடித்த சம்பவம் நோயாளிகள் மற்றும் பொதுமக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது. பொன்மலை அருகே உள்ள ஆலத்தூர் கிராமத்தைச் சேர்ந்த தமிழ்கொடி (60) என்பவர், எலும்பு முறிவு சிகிச்சைக்காக கடந்த ஒரு வாரமாக இம்மருத்துவமனையில் அனுமதிக்கப்பட்டிருந்தார். இந்நிலையில், இன்று அதிகாலை வார்டுக்குள் சுற்றித் திரிந்த எலி ஒன்று, கட்டிலில் படுத்திருந்த மூதாட்டியின் கால் கட்டை விரலைக் கடித்துள்ளது. வலியால் அவர் அலறியதையடுத்து, அங்கு வந்த மருத்துவக் குழுவினர் அவருக்கு உடனடியாக முதலுதவி சிகிச்சை அளித்து, எலிக்கடிக்கான தடுப்பூசியைச் செலுத்தினர்.

அரசு மருத்துவமனைகளில் சுகாதாரமற்ற சூழலும் பராமரிப்பின்மையும் தொடர்கதையாகி வருவதற்கு இச்சம்பவம் மற்றொரு சான்றாக அமைந்துள்ளது. கடந்த 2012-ஆம் ஆண்டு சென்னை திருவல்லிக்கேணி கஸ்தூரிபா காந்தி அரசு மருத்துவமனையில், உயிரிழந்த பச்சிளம் குழந்தையின் உடலை எலி குதறிய கொடூரம் அரங்கேறியது. அத்தகைய அதிர்ச்சி சம்பவங்களில் இருந்து பாடம் கற்காமல், நோயாளிகள் தங்கி சிகிச்சை பெறும் வார்டுகளிலேயே எலிகளின் நடமாட்டம் அதிகரித்து வருவது நோயாளிகளின் பாதுகாப்பைக் கேள்விக்குறியாக்கியுள்ளது. மருத்துவமனை நிர்வாகத்தின் இத்தகைய அலட்சியப்போக்கு பொதுமக்களிடையே பெரும் கொந்தளிப்பை உருவாக்கியுள்ளது.

ஒருபுறம் மருத்துவமனையில் நோயாளி எலியால் கடிக்கப்பட்டு அவதியுற்ற நிலையில், இச்சம்பவம் நடந்த அதே நேரத்தில் மக்கள் நல்வாழ்வுத்துறை அமைச்சர் திரையரங்கிற்குச் சென்று படம் பார்த்த செய்தி வெளியாகி மேலும் சர்ச்சையைக் கூட்டியுள்ளது. அடிப்படைச் சுகாதாரத்தையும் நோயாளிகளின் பாதுகாப்பையும் உறுதி செய்ய வேண்டிய பொறுப்பில் உள்ள அரசு, இத்தகைய அசம்பாவிதங்கள் மீண்டும் நடக்காத வண்ணம் உடனடியாக தீவிர நடவடிக்கை எடுக்க வேண்டும் என்பதே சமூக ஆர்வலர்களின் பலத்த கோரிக்கையாக உள்ளது.