சத்தீஸ்கர் மாநிலத்தில் கடந்த 4 மாதங்களில் 8 பேரை அடுத்தடுத்து விஷம் வைத்துக் கொன்ற “சைக்கோ” கொலையாளி ராம் சஹய் ஜெய்ஸ்வாலின் அதிர்ச்சியூட்டும் கொலைக் குற்றங்கள் வெளிச்சத்திற்கு வந்துள்ளன. இவர் தனது கொடூரமான திட்டத்தை அரங்கேற்றுவதற்கு முன்பாக, விஷத்தின் வீரியத்தை சோதித்துப் பார்க்க முடிவு செய்துள்ளார். இதற்காக முதலில் வெண்காரத்தை ஒரு நாய்க்கு கொடுத்து மாதிரி பார்த்துவிட்டு, அது வேலை செய்வதை உறுதி செய்த பின்னரே தனது தொடர் கொலைகளைச் செயல்படுத்தியுள்ளார்.
பாதிக்கப்பட்டவர்களைக் கொல்வதற்காக அவர் ஒரு தந்திரமான வழியைக் கையாண்டுள்ளார். இதனை மனதில் வைத்து, ஒவ்வொருவரையும் தனது வீட்டிற்கு மாலைநேரத்தில் மது அருந்த வருமாறு ராம் சஹய் ஜெய்ஸ்வால் அழைத்துள்ளார். “இன்று மது அருந்தினால், நாளை அவர்கள் உயிரோடு இருக்க மாட்டார்கள்” என்ற கணக்கோடு, மதுவில் வெண்காரத்தைக் கலந்து கொடுத்துள்ளார். மதுவின் போதையில் இருந்ததால், விஷம் கலந்திருப்பதை பாதிக்கப்பட்டவர்களால் கண்டறிய முடியாமல் போயுள்ளது.
இந்தக் கொலையாளியின் மிக விசித்திரமான மற்றும் ஆபத்தான குணம் என்னவென்றால், கொலை செய்த பிறகு அவர் அவ்விடத்தை விட்டு தப்பியோடவில்லை. மாறாக, விஷம் குடித்தவர்கள் உயிருக்குப் போராடும்போது, பாதிக்கப்பட்டவர்களின் குடும்பத்தினருடன் சேர்ந்து பதற்றமடைவது போல் நடித்து, அவர்களை மருத்துவமனைக்கு அழைத்துச் செல்லும் நாடகத்தையும் அரங்கேற்றியுள்ளார். இதன் மூலம் தன் மீது யாருக்கும் எந்த சந்தேகமும் வராதவாறு குடும்பத்தினருடன் ஒரு நலம் விரும்பி போல அவர் நீண்ட நாட்களாகப் பழகி வந்துள்ளார்.