நடந்து முடிந்த தமிழ்நாடு சட்டமன்றத் தேர்தல் முடிவுகள் ஆளுங்கட்சியாக இருந்த திமுகவிற்குப் பேரதிர்ச்சியாக அமைந்துள்ளன. புதிதாக களம் கண்ட தமிழக வெற்றிக் கழகத்திடம் ஆட்சியைப் பறிகொடுத்தது மட்டுமன்றி, திமுக தலைவரும் முன்னாள் முதலமைச்சருமான மு.க.ஸ்டாலின் தனது சொந்தத் தொகுதியான கொளத்தூரிலேயே தோல்வியைத் தழுவியுள்ளார். தவெகவின் இந்த இமாலய வெற்றிக்கு சமூக வலைத்தளங்கள் மட்டுமே காரணம் என்று திமுகவினர் வெளியே கூறினாலும், கட்சியின் மூத்த நிர்வாகிகளின் அலட்சியம், தேர்தல் களத்தில் நிலவிய உள்குத்துகள் மற்றும் அவர்கள் மீதான ஊழல் புகார்களே இந்த படுதோல்விக்கு முக்கியக் காரணம் என்ற உண்மை தலைமைக்குக் கொண்டு செல்லப்பட்டுள்ளது.
குறிப்பாக, இந்தத் தேர்தலில் தவெகவின் வெற்றிக்கு இளைஞர்கள் மற்றும் முதல் தலைமுறை வாக்காளர்கள் பெரும் பக்கபலமாக இருந்துள்ளனர். இதனால் விழித்துக்கொண்ட திமுக தலைமை, இழந்த செல்வாக்கை மீட்டெடுக்க இளைஞர்களைக் கவரும் வகையில் கட்சியை மறுசீரமைப்பு செய்யத் திட்டமிட்டுள்ளது. தங்களுக்கு வாக்களிக்கத் தவறிய இளைய தலைமுறையினரை ஈர்க்க வேண்டுமானால், கட்சியின் முக்கியப் பொறுப்புகளிலும் இளைஞர்களுக்கே முன்னுரிமை அளிக்க வேண்டும் என்ற கோரிக்கை மு.க.ஸ்டாலினுக்கு வலுவாக முன்வைக்கப்பட்டு வருகிறது.
கடந்த தேர்தலிலேயே மூத்தவர்களைக் காட்டிலும் இளைஞர்களுக்கு அதிக வாய்ப்பளிக்க வேண்டும் என்று உதயநிதி ஸ்டாலின் வலியுறுத்தியும், அது முழுமையாக ஏற்றுக்கொள்ளப்படவில்லை. தற்போது லண்டன் பயணத்தை முடித்துக்கொண்டு சென்னை திரும்பியதும் கட்சியில் மிகப்பெரிய அதிரடி நடவடிக்கைகளை மேற்கொள்ள மு.க.ஸ்டாலின் காய் நகர்த்தி வருகிறார். கட்சியின் எதிர்காலம் உதயநிதிதான் என்பதை உணர்ந்து, நிர்வாகிகள் நியமனம், தேர்தல் உத்திகள் மற்றும் இறுதி முடிவெடுக்கும் முழு அதிகாரத்தையும் அவரிடமே ஒப்படைக்க ஸ்டாலின் திட்டமிட்டுள்ளதாகத் தெரிகிறது.
இதன் ஒரு பகுதியாக, துரைமுருகன் உள்ளிட்ட திமுகவின் மூத்த தலைவர்கள் பலரை பதவிகளில் இருந்து விலகக் கோரி தலைமை அறிவுறுத்தி வருவதாகக் கூறப்படுகிறது. உதயநிதி ஸ்டாலின் கையில் முழு அதிகாரமும் வரும்போது, இந்த சீனியர் தலைவர்கள் அனைவரும் ஓரங்கட்டப்பட்டு, ஒரு புதிய இளைஞர் பட்டாளம் கட்சியின் முன்னிலைக்குக் கொண்டு வரப்படவுள்ளது. அடிமட்டம் முதல் தலைமை வரை தோல்விக்குக் காரணமானவர்கள் மீது ஒழுங்கு நடவடிக்கை பாயும் என்ற அச்சத்தில், தங்களது பதவிகளைக் காப்பாற்றிக் கொள்ள முடியாமல் சீனியர்கள் தற்போது செய்வதறியாது திகைத்து நிற்கின்றனர்.