1 பேருக்கு 10 பேர் வேலை…. தமிழக மின்சாரத் துறையில் 65.921 காலிப்பணியிடங்களா?… ஷாக் தரும் வெள்ளை அறிக்கை… அமைச்சர் நிர்மல் குமார் வெளியிட்ட மின்வாரிய ரிப்போர்ட்…!

தமிழக மின்சாரத் துறையின் நிதி நிலை, செலவினங்கள் மற்றும் கட்டமைப்பு வசதிகள் குறித்து 2001-ஆம் ஆண்டு முதலான தரவுகளை உள்ளடக்கிய விரிவான வெள்ளை அறிக்கையை மின்சாரத் துறை அமைச்சர் நிர்மல் குமார் வெளியிட்டுள்ளார். இந்த அறிக்கையின்படி, தமிழக மின்வாரியத்தில் ஒட்டுமொத்தமாக 1,40,635 பணியாளர்கள் தேவைப்படும் நிலையில், தற்போது வெறும் 74,174 பேர் மட்டுமே பணியில் உள்ளனர். இதன் காரணமாக 65,921 பணியிடங்கள் காலியாக இருப்பதாகக் குறிப்பிட்டுள்ள அமைச்சர், தற்போதைய சூழலில் ஒரு நபர் 10 பேரின் வேலையைச் செய்ய வேண்டிய கட்டாயத்திற்குத் தள்ளப்பட்டுள்ளார் என்றும், கடந்த திமுக ஆட்சியில் வெறும் 343 பேர் மட்டுமே பணி நியமனம் செய்யப்பட்டுள்ளனர் என்றும் சுட்டிக்காட்டியுள்ளார். இந்த இக்கட்டான சூழலைச் சமாளிக்க, இந்த ஆண்டில் மட்டும் 20,449 பேரை புதிய பணியாளர்களாக நியமிக்க அரசு திட்டமிட்டுள்ளது.

கடந்த 25 ஆண்டுகால மின்சாரத் துறையின் நிதிப் பற்றாக்குறையையும் இந்த வெள்ளை அறிக்கை மிகத் தெளிவாகப் பட்டியலிட்டுள்ளது. 2001-2006 காலகட்டத்தில் ரூ. 8,355 கோடியாக இருந்த வருவாய் பற்றாக்குறை, அடுத்தடுத்த ஆண்டுகளில் தொடர்ந்து அதிகரித்து 2016-2021 காலகட்டத்தில் உச்சகட்டமாக ரூ. 58,534 கோடியை எட்டியது. எனினும், முந்தைய திமுக ஆட்சிக் காலத்தில் வருவாய் 4,97,996 கோடியாகவும், செலவு 5,32,443 கோடியாகவும் இருந்ததால் வருவாய் பற்றாக்குறை ரூ. 34,447 கோடியாகக் குறைந்துள்ளது. கடந்த கால் நூற்றாண்டில் ஊழியர்களின் எண்ணிக்கையை உயர்த்துவதிலோ அல்லது சொந்த மின் உற்பத்திக் கட்டமைப்புகளை மேம்படுத்துவதிலோ போதிய கவனம் செலுத்தப்படவில்லை என்பது இந்த நிதியியல் தரவுகள் மூலம் வெளிச்சத்திற்கு வந்துள்ளது.

மின்சாரத் துறையின் தற்போதைய உள்கட்டமைப்பு மற்றும் எதிர்காலத் தேவைகள் குறித்தும் அமைச்சர் கவலை தெரிவித்துள்ளார். கடந்த 25 ஆண்டுகளுக்கு முன்பு இருந்ததை விடத் தமிழகத்தின் மின் தேவை தற்போது 5 மடங்கு அதிகரித்துள்ளதுடன், மாநிலத்தின் உச்சபட்ச மின் தேவை 20,321 மெகாவாட்டாக உயர்ந்துள்ளது. ஆனால், அதற்கு இணையான பெரிய அளவிலான மின் உற்பத்தித் திட்டங்களை அரசு செயல்படுத்தவில்லை. உதாரணமாக, 2021-ஆம் ஆண்டு முதல் உப்பூர் அனல் மின் நிலையத் திட்டம் தொடர்ந்து கிடப்பில் போடப்பட்டுள்ளது. மேலும், தமிழகத்தில் உள்ள மொத்தம் 4,47,603 மின்மாற்றிகளில் (Transformers), 25 ஆண்டுகளைக் கடந்த பழமையான மின்மாற்றிகளின் எண்ணிக்கை மட்டும் 42,808 ஆக உள்ளது. அதேபோல, 25 ஆண்டுகளைக் கடந்த 184 துணை மின் நிலையங்களும் (Substations) தற்போது செயல்பாட்டில் உள்ளன.

இந்த உள்கட்டமைப்புச் சவால்களை எதிர்கொண்டு மின்சாரத் துறையை நவீனமயமாக்கத் தமிழக அரசு அதிரடி நடவடிக்கைகளை மேற்கொண்டு வருகிறது. 25 ஆண்டுகளைக் கடந்த பழமையான துணை மின் நிலையங்களைப் புதுப்பிப்பதற்காக ரூ. 8,310 கோடியை முதல்வர் விஜய் ஒதுக்கீடு செய்து உத்தரவிட்டுள்ளார். மேலும், வரும் காலங்களில் மாநிலம் முழுவதும் 1.5 லட்சம் மின்மாற்றிகளைப் புதுப்பிக்கத் திட்டமிடப்பட்டுள்ளது. புதிய மின்மாற்றிகளைத் தொடங்குவதற்காக ரூ. 21,512 கோடி நிதி ஒதுக்கீடு செய்யப்பட்டு, தற்போது 60 ஆயிரம் புதிய மின்மாற்றிகள் அமைக்கும் பணிகள் உத்வேகத்துடன் தொடங்கப்பட்டுள்ளன. அடுத்த 5 ஆண்டுகளில் 16,782 பணியாளர்கள் ஓய்வு பெறவுள்ள நிலையைக் கருத்தில் கொண்டு, எதிர்காலத் தேவைகளைப் பூர்த்தி செய்யும் வகையில் உள்கட்டமைப்பும் மனிதவளமும் முழு வீச்சில் மேம்படுத்தப்பட்டு வருகின்றன.