தொழிலதிபர் ஜெம் வீரமணி சம்பந்தப்பட்ட சிறுமிகள் பாலியல் வன்கொடுமை வழக்கின் விசாரணை தீவிரமடைந்துள்ள நிலையில், வீடியோ ஆதாரங்கள் மூலம் அடையாளம் காணப்பட்ட 10 சிறுமிகளிடம் காவல்துறையினர் வாக்குமூலம் பெற்றுள்ளனர். ஏழைச் சிறுமிகளுக்குப் படிப்பு உதவி வழங்குவதாக ஆசை வார்த்தை கூறி, அவர்களை ஒரு வீட்டில் அடைத்து வைத்துப் பாலியல் பலாத்காரம் செய்ததாக எழுந்த புகாரின் அடிப்படையில், ஜெம் வீரமணி மற்றும் அவருக்கு உடந்தையாக இருந்த சாந்தி, அவரது கணவர் மகேந்திர சிம்ஹன் ஆகியோர் கைது செய்யப்பட்டு புழல் சிறையில் அடைக்கப்பட்டுள்ளனர்.
இந்த வழக்கில் முக்கிய திருப்புமுனையாக, குற்றச் செயல்கள் தொடர்பான வீடியோ ஆதாரங்களைச் செயற்கை நுண்ணறிவு (AI) தொழில்நுட்பத்தின் உதவியுடன் காவல்துறையினர் ஆய்வு செய்துள்ளனர். பாதிக்கப்பட்ட சிறுமிகள் தற்போது மேஜராகி விட்டதால் அவர்களை அடையாளம் காண்பதில் பெரும் சிரமம் நிலவிய நிலையில், ஏஐ தொழில்நுட்பம் மூலம் அவர்கள் வெற்றிகரமாக அடையாளம் காணப்பட்டனர். தொடர்ந்து, அந்தச் சிறுமிகளைப் பல்வேறு இடங்களுக்கு அழைத்துச் சென்று விசாரணை நடத்திய காவல்துறை அதிகாரிகள், அவர்களிடம் இருந்து முறையான வாக்குமூலங்களைப் பதிவு செய்துள்ளனர்.
இதனிடையே, இந்த விவகாரத்தில் காவல் துறையின் நடவடிக்கை குறித்து புதிய சர்ச்சை ஒன்று உருவெடுத்துள்ளது. ஜெம் வீரமணி சிறுமிகளை மிரட்டி பாலியல் வன்கொடுமை செய்த சம்பவம் குறித்து, கடந்த 2024-ஆம் ஆண்டிலேயே வீடியோ ஆதாரங்களுடன் சென்னை காவல் ஆணையர் அலுவலகத்தில் புகார் அளித்ததாகத் தமிழக காங்கிரஸ் கட்சியின் எஸ்சி, எஸ்டி பிரிவு நிர்வாகி ரஞ்சன் குமார் தெரிவித்துள்ளார். ஆனால், அப்போதே நடவடிக்கை எடுக்காமல், 2025-இல் தான் தன்னார்வலர் மூலம் தகவல் கிடைத்ததாகக் காவல்துறை தரப்பில் கூறுவது தவறானது என்றும் அவர் குற்றம் சாட்டியுள்ளார்.
தற்போது இந்த வழக்கில் கைது செய்யப்பட்டுள்ள சாந்தி மற்றும் மகேந்திர சிம்ஹன் ஆகியோர் ஜாமீன் கோரி மனுத் தாக்கல் செய்துள்ள நிலையில், அவர்களிடம் தீவிர விசாரணை நடத்தப் போக்ஸோ நீதிமன்றத்தில் காவல்துறையினர் 3 நாட்கள் காவல் கோரி மனு அளித்துள்ளனர். இந்த விசாரணையின் போது, எத்தனை சிறுமிகள் பாதிக்கப்பட்டுள்ளனர், எத்தனை ஆண்டுகளாக இந்த அநீதி நடந்து வந்தது மற்றும் இதில் வேறு யாருக்கெல்லாம் தொடர்பு உள்ளது என்ற அதிர்ச்சி தகவல்கள் வெளியாகும் என எதிர்பார்க்கப்படுகிறது.