பமதுராந்தகம் மற்றும் தாராபுரம் சட்டமன்றத் தொகுதிகளில் வரும் அக்டோபர் 6 ஆம் தேதி இடைத்தேர்தல் நடைபெறவுள்ள நிலையில், தமிழக அரசியல் களம் பெரும் சூடு பிடித்துள்ளது. மதுராந்தகத்தில் திமுக வேட்பாளர் பரந்தாமனை ஆதரித்து தீவிர பிரச்சாரத்தில் ஈடுபட்டு வரும் முன்னாள் பொதுப்பணித்துறை அமைச்சர் எ.வ.வேலு, தவெக அரசின் நடவடிக்கைகளையும் அமைச்சர்களையும் கடுமையாக விமர்சித்து வருகிறார். குறிப்பாக சென்னை பட்டினப்பாக்கத்தில் புதிய தலைமைச் செயலகம் அமைக்கும் விவகாரத்தில் அரசு பின்வாங்கப் போவதாக வெளிவரும் தகவல்கள் மற்றும் அது தொடர்பான கருத்துகளுக்கு எ.வ.வேலு தனது நீண்டகால ஆட்சி அனுபவத்தைக் கொண்டு சுடச்சுட பதிலடி கொடுத்துள்ளார்.
பட்டினப்பாக்கத்தில் புதிய தலைமைச் செயலகம் கட்டுவதற்கு பொதுமக்கள் மற்றும் அரசியல் கட்சிகளிடையே கடும் எதிர்ப்பு கிளம்பியுள்ளது. இந்த நிலையில், “பட்டினப்பாக்கத்தில் தலைமைச் செயலகம் கட்டுவது குறித்து முதலமைச்சர் விஜய் இன்னும் இறுதி முடிவு எடுக்கவில்லை” என தவெக அமைச்சர் ஆதவ் அர்ஜுனா தெரிவித்திருந்தார். அமைச்சரின் இந்த கூற்றைச் சுட்டிக்காட்டி கடுமையாகச் சாடிய எ.வ.வேலு, “முதலமைச்சர் முடிவு எடுக்காமல் தான் அரசாணை வெளிவந்ததா? அரசாணை என்பது ஏதோ விளையாட்டாக வெளியிடப்படும் ஒன்றல்ல; அது அரசின் அதிகாரப்பூர்வ கொள்கை முடிவு” என்று கூறி, ஆதவ் அர்ஜுனா அறியாமையுடன் பேசுவதாகக் சாடினார்.
தொடர்ந்து பேசிய அவர், ஒரு அரசாணை வெளியிடப்படுவதற்கு முன்பாக அரசு பல கட்ட ஆய்வுகளை மேற்கொள்ள வேண்டும் என விளக்கினார். “பட்டினப்பாக்கத்தில் தலைமைச் செயலகம் அமைத்தால் அப்பகுதி மக்களின் வாழ்வாதாரம் என்னவாகும், கடலுக்கு அருகில் அமைக்கப்படும் என்பதால் அதற்கு உரிய சுற்றுச்சூழல் அனுமதி கிடைக்குமா என்பன போன்ற அனைத்து அம்சங்களையும் ஆராய்ந்த பிறகே அரசாணை வெளியிடப்படும். முதலமைச்சர் விஜய் தானாக முன்வந்து சட்டமன்றத்தில் 110 விதியின் கீழ் அறிவித்த பிறகே அரசாணை வந்தது. நிலைமை இப்படி இருக்க, முதலமைச்சருக்குத் தெரியாது என்று சொல்வதன் மூலம் ‘விவரம் இல்லாத முதலமைச்சர்’ என்று நீங்களே ஒப்புக்கொள்கிறீர்களா?” எனக் கேள்வி எழுப்பினார்.
முன்னாள் பொதுப்பணித்துறை அமைச்சராகப் பல பிரம்மாண்ட கட்டுமானப் பணிகளை முன்னின்று நடத்திய அனுபவம் கொண்ட எ.வ.வேலுவின் இந்த அதிரடி விமர்சனம், தவெக வட்டாரத்தில் பெரும் அதிர்வலைகளை ஏற்படுத்தியுள்ளது. இடைத்தேர்தலில் திமுகவின் வெற்றிக்காக களத்தில் சுழன்று பணியாற்றி வரும் அவர், தவெக அரசின் நிர்வாக அனுபவமின்மையையும் கொள்கை முடிவுகளில் உள்ள குழப்பங்களையும் சுட்டிக்காட்டி முன்வைத்துள்ள இந்தக் கேள்விகள், தற்போதைய தேர்தல் களத்தில் முக்கிய விவாதப் பொருளாக மாறியுள்ளன.