2026 தமிழக சட்டமன்றத் தேர்தல் நெருங்கி வரும் சூழலில், திமுக கூட்டணியில் பாமக இணையக்கூடும் என்ற அரசியல் யூகங்களுக்கு மத்தியில், பாமக நிறுவனர் மருத்துவர் ராமதாஸ் திமுக அரசு மீது கடுமையான விமர்சனங்களை முன்வைத்துள்ளார். மாதந்தோறும் மின் கட்டணம் வசூலிக்கும் முறையை அமல்படுத்துவதிலும், ஸ்மார்ட் மீட்டர் பொருத்துவதிலும் தமிழக அரசு மெத்தனம் காட்டுவதாக அவர் தனது அறிக்கையில் சாடியுள்ளார். அமைச்சர்களின் முரண்பட்ட அறிவிப்புகள் மற்றும் தேர்தல் வாக்குறுதிகளை நிறைவேற்றாத போக்கினை அவர் சுட்டிக்காட்டியுள்ளது அரசியல் வட்டாரத்தில் பெரும் சலசலப்பை ஏற்படுத்தியுள்ளது.
திமுகவின் 2021 தேர்தல் அறிக்கையில் கூறப்பட்ட ‘இரண்டு மாதங்களுக்கு ஒருமுறை மின் பயன்பாடு 1000 யூனிட்டிற்கு குறைவாக இருப்பவர்களுக்கு ரூ.6000 வரை பயன் கிடைக்கும்’ என்ற வாக்குறுதி இதுவரை நிறைவேற்றப்படவில்லை என ராமதாஸ் குற்றம் சாட்டியுள்ளார். ஸ்மார்ட் மீட்டர்களைப் பொருத்த இன்னும் இரண்டு ஆண்டுகள் ஆகும் என அதிகாரிகள் கூறுவது, தேர்தலுக்கு முன் இந்தத் திட்டத்தைச் செயல்படுத்த அரசுக்கு விருப்பம் இல்லை என்பதையே காட்டுவதாக அவர் விமர்சித்துள்ளார். அமைச்சர்கள் தங்கம் தென்னரசு மற்றும் சிவசங்கர் ஆகியோரின் கடந்தகால அறிவிப்புகளை ஒப்பிட்டு, அரசின் செயல்பாடுகளில் உள்ள தொய்வை அவர் அம்பலப்படுத்தியுள்ளார்.
குறிப்பாக, 2026 சட்டமன்றத் தேர்தல் மே மாதம் போன்ற கோடை காலத்தில் நடைபெற வாய்ப்புள்ள நிலையில், அப்போது பொதுமக்கள் எதிர்கொள்ளும் மின் கட்டணச் சுமை மக்கள் மத்தியில் கடும் கோபத்தை உருவாக்கும் என்று ராமதாஸ் எச்சரித்துள்ளார். இந்த அதிருப்தி தேர்தலில் வாக்களிக்கும் போது எதிரொலிக்கும் என்றும் அவர் கூறியுள்ளார். அதிமுக மற்றும் பாஜக தலைமையிலான கூட்டணியில் அன்புமணி ராமதாஸ் இடம்பெற்றுள்ள சூழலில், ராமதாஸின் இந்தத் திடீர் அட்டாக், திமுகவுடனான பாமகவின் ரகசியப் பேச்சுவார்த்தை தோல்வியடைந்ததா அல்லது தேர்தலுக்கான புதிய வியூகமா என்ற விவாதத்தை அரசியல் களத்தில் கிளப்பியுள்ளது.