அடுத்தடுத்து பரபரப்பு..! தவெக-விற்கு பாமக ஆதரவு..? சௌமியா அன்புமணி வைத்த சஸ்பென்ஸ்…!!

தமிழகச் சட்டமன்றத் தேர்தல் முடிவுகள் வெளியான நிலையில், தர்மபுரி தொகுதியில் வெற்றி பெற்றுள்ள பாட்டாளி மக்கள் கட்சியின் சௌமியா அன்புமணி, தமிழக வெற்றிக் கழகத்திற்கு (தவெக) ஆதரவு அளிப்பது குறித்து முக்கிய விளக்கமளித்துள்ளார். தவெக ஆட்சி அமைக்கப் பாமக ஆதரவு அளிக்குமா என்ற கேள்விக்கு பதிலளித்த அவர், இது குறித்துக் கட்சியின் தலைவர் அன்புமணி ராமதாஸ் முறையான முடிவெடுப்பார் என்று தெரிவித்துள்ளார். தமிழகத்தில் புதிய அரசியல் மாற்றங்கள் குறித்துப் பேசப்பட்டு வரும் வேளையில், பாமகவின் இந்த நிலைப்பாடு மிகுந்த முக்கியத்துவம் பெறுகிறது.

தனது வெற்றிக்குப் பிறகு செய்தியாளர்களைச் சந்தித்த சௌமியா அன்புமணி, தர்மபுரி மக்கள் தன் மீது வைத்துள்ள நம்பிக்கைக்கு நெகிழ்ச்சியுடன் நன்றி தெரிவித்தார். தனது மனதில் எப்போதும் தர்மபுரி தொகுதிக்குத் தனி இடம் உண்டு என்றும், தற்போது தர்மபுரி மக்களின் மனதிலும் தான் இடம் பிடித்துள்ளதை இந்தத் தேர்தல் முடிவுகள் நிரூபித்துள்ளன என்றும் அவர் பெருமிதத்துடன் குறிப்பிட்டார். மக்களின் எதிர்பார்ப்புகளை நிறைவேற்றும் வகையில் தனது செயல்பாடுகள் அமையும் என்பதையும் அவர் கோடிட்டுக் காட்டினார்.

மேலும், தேர்தல் பிரச்சாரத்தின் போது தான் அளித்த அனைத்து வாக்குறுதிகளையும் நிறைவேற்றுவதில் தீவிரமாகப் பணியாற்றுவேன் என அவர் உறுதியளித்தார். தர்மபுரி தொகுதியின் வளர்ச்சிக்காகத் தனது முழு பங்களிப்பையும் வழங்க உள்ளதாகத் தெரிவித்த அவர், தொகுதி மக்களின் நலனே தனது முதன்மையான நோக்கம் என்றும் கூறினார்