“நீங்களே வீட்ல செஞ்சு சாப்பிடுங்க…” நள்ளிரவில் மட்டன் பிரியாணி ஆர்டர்… பார்சலை பிரித்து பார்த்த வாடிக்கையாளருக்கு ஷாக்… கிண்டலாக கமெண்ட் செய்யும் நெட்டிசன்கள்…!!

அசாம் மாநிலம் போங்கைகாவோன் பகுதியைச் சேர்ந்த சமேஷ் மொண்டல் என்பவர் நள்ளிரவில் மிகுந்த பசியோடு ‘சொமாட்டோ’ செயலி மூலம் ‘கொல்கத்தா பிரியாணி’ என்ற உணவகத்தில் இருந்து மட்டன் பிரியாணி ஆர்டர் செய்திருந்தார்.

உணவுப் பொட்டலம் வந்ததும் மிகுந்த ஆவலுடன் அதைத் திறந்து பார்த்த அவருக்குப் பேரதிர்ச்சி காத்திருந்தது. அதில் பிரியாணிக்குப் பதிலாக வெறும் வெள்ளைச் சாதமும், அதனுடன் சிறிய பாக்கெட்டில் சாலட்டும் மட்டுமே இருந்தன. இதனால் அதிர்ச்சியடைந்த அவர், தனது ஆர்டர் பில் மற்றும் உணவின் புகைப்படங்களை இன்ஸ்டாகிராமில் பகிர்ந்து, “இது என்ன மாதிரியான மோசடி? நான் பிரியாணிக்குத்தான் பணம் கொடுத்தேன், வெற்றுச் சாதத்திற்கு அல்ல” எனக் கேள்வி எழுப்பியிருந்தார். மேலும், “வெறும் சாதத்துடன் சாலட் அனுப்பியதற்கு ரொம்ப நன்றி” என அந்த உணவகத்தைக் கிண்டலாகவும் சாடியிருந்தார்.

இவரது பதிவு சமூக வலைதளங்களில் வைரலானதைத் தொடர்ந்து, நெட்டிசன்கள் பலரும் கிண்டலான கருத்துகளைப் பதிவிட்டு வருகின்றனர். “அவர்கள் பிரியாணிதான் அனுப்பியுள்ளார்கள், அதை நீங்கள்தான் வீட்டிலேயே சமைத்துச் சாப்பிட வேண்டும்” என்றும், “உங்களை ஆரோக்கியமாக வைத்திருக்கவே எண்ணெயில்லாத சாதமும் சாலட்டும் கொடுத்துள்ளார்கள்” என்றும் கலாய்த்து வருகின்றனர். இந்தச் சம்பவத்திற்குப் பிறகு, பாதிக்கப்பட்ட வாடிக்கையாளருக்குச் சொமாட்டோ நிறுவனம் பணத்தைத் திரும்ப வழங்கியுள்ளது.