தற்போது ஆரோக்கியமான சிற்றுண்டியாகக் கருதப்படும் மக்கானா (தாமரை விதை), சில உடல்நலப் பாதிப்புகள் உள்ளவர்களுக்குத் தீங்காக முடிய வாய்ப்புள்ளது. மக்கானாவில் நார்ச்சத்து மற்றும் சிக்கலான மாவுச்சத்து அதிகம் இருப்பதால், செரிமானக் குறைபாடு, வாயுத்தொல்லை அல்லது மலச்சிக்கல் உள்ளவர்கள் இதைத் தவிர்ப்பது நல்லது; ஏனெனில் இது வயிறு உப்புசத்தை மேலும் அதிகரிக்கும். அதேபோல், இரத்த அழுத்தத்தைக் குறைக்கும் தன்மை இதற்கு உண்டு என்பதால், ஏற்கனவே குறைந்த இரத்த அழுத்தம் (Low BP) உள்ளவர்களுக்கு இது தலைசுற்றல் மற்றும் சோர்வை ஏற்படுத்தக்கூடும்.
சிறுநீரகக் கோளாறு உள்ளவர்கள் மக்கானாவில் உள்ள பொட்டாசியம் மற்றும் பாஸ்பரஸ் காரணமாக மருத்துவரின் ஆலோசனைப்படியே இதை உட்கொள்ள வேண்டும். மேலும், சிலருக்கு மக்கானாவால் ஒவ்வாமை ஏற்பட்டு அரிப்பு அல்லது சுவாசக் கோளாறுகள் வரலாம். உடல் எடையைக் குறைக்க விரும்புவோர் நாள் முழுவதும் மக்கானாவை மட்டுமே உணவாகக் கொள்ளக்கூடாது; ஏனெனில் இதில் புரதச்சத்து குறைவாக இருப்பதால் உடல் பலவீனமடைய வாய்ப்புள்ளது. எதையும் அளவோடு உட்கொள்வதே உடலுக்கு நலம் பயக்கும் என்பதைப் புரிந்து செயல்பட வேண்டும்.