தற்போது 2026 சட்டமன்ற தேர்தலை முன்னிட்டு அரசியல் கட்சிகள் தீவிரமாக செயல்பட்டு வருகிறார்கள். திரைக்கு முன்னும் பின்னும் கூட்டணி குறித்த பேச்சு வார்த்தை அடிபட்டு வருகிறது. இதற்கிடையில் தமிழகத்திற்கு கடந்த சில தினங்களுக்கு முன்பாக பிரதமர் தமிழகத்திற்கு வந்திருந்தார். இவரை சந்திக்க ஓபிஎஸ் நேரம் கேட்ட நிலையில் அவருக்கு அனுமதி அளிக்கப்படவில்லை. அதே நேரம் எடப்பாடிக்கு நேரம் ஒதுக்கப்பட்டு பிரதமரை சந்தித்தார்.
இந்நிலையில் மோடி, அமித்ஷா என பாஜகவிலிருந்து அடுத்தடுத்த புறக்கணிப்பால் ஓபிஎஸ் கடும் அதிருப்தியில் இருக்கிறார். இதனிடையே, பாஜக கூட்டணி மிகவும் ஆபத்தானது என ஓபிஎஸ்-ன் அரசியல் ஆலோசகர் பண்ருட்டி ராமச்சந்திரன் பேசியது அரசியலில் பரபரப்பை ஏற்படுத்தியிருந்தது. அந்த சூடு தணிவதற்குள் தமிழகத்திற்கான கல்வி நிதியை வழங்காத மத்திய அரசை கண்டித்து ஓபிஎஸ் அறிக்கை வெளியிட்டுள்ளார். மேலும் NDA-வில் இருந்து விலகி, TVK கூட்டணியில் இணைய உள்ளதாகவும் பேச்சுக்கள் அடிபடுகிறது. இந்நிலையில் தேர்தல் கூட்டணி தொடர்பாக ஓபிஎஸ் நாளை தனது ஆதரவாளர்களுடன் அவசர ஆலோசனை நடத்த உள்ளதாக தகவல் வெளியாகியுள்ளது.