பாக்சிங்கை விட கார் ரேஸ் ரொம்ப கஷ்டம்.. அஜித்தை பாராட்டி வீடியோ வெளியிட்ட ஒலிம்பியன் தேவராஜன்..!

தமிழ் சினிமாவின் முன்னணி நடிகராக வலம் வந்து கொண்டிருக்கும் நடிகர் அஜித் நடிப்பில் அடுத்தடுத்து விடாமுயற்சி மற்றும் குட் பேட் அக்லி ஆகிய திரைப்படங்கள் ரிலீஸ் ஆக உள்ளது. இதில் பொங்கல் ரேசில் களமிறங்க உள்ளதாக அறிவிக்கப்பட்ட விடா முயற்சி திரைப்படம் கடைசி நேரத்தில் அதிலிருந்து விலகியது. இதனைத் தொடர்ந்து இந்த படம் இம்மாதம் இறுதியில் ரிலீஸ் ஆக உள்ளதாக கூறப்பட்டுள்ளது. விரைவில் அதன் அறிவிப்பு வரும் என்று ரசிகர்கள் எதிர்பார்த்து காத்திருக்கின்றனர். இந்த நிலையில் அஜித்தின் குட் பேட் அக்லி படத்தின் ரிலீஸ் வரும் ஏப்ரல் பத்தாம் தேதி என்று அறிவிக்கப்பட்டுள்ளது.

இந்த இரண்டு படங்களின் சூட்டிங் மற்றும் படப்பிடிப்பு என அடுத்தடுத்த வேலைகளை முடித்துக் கொடுத்து விட்ட அஜித் துபாயில் நடக்கும் கார் ரேஸில் பங்கேற்பதற்காக சென்று உள்ளார். முன்னதாக சிங்கப்பூரில் தன்னுடைய குடும்பத்தினருடன் புத்தாண்டு கொண்டாட்டத்தில் ஈடுபட்ட அஜித் தான் மட்டும் துபாய் சென்ற நிலையில் ஷாலினி உள்ளிட்ட அவருடைய குடும்பத்தினர் சென்னை திரும்பினார். இந்த நிலையில் ரேசில் பங்கேற்பதற்காக அடுத்தடுத்த பயிற்சிகளில் அஜித் ஈடுபட்ட வீடியோக்கள் வெளியானது.

இதனைத் தொடர்ந்து கார் ரேஸில் இருந்து அஜித் விலகிய நிலையில் அவர் அணி பங்கேற்கும் என அறிவிக்கப்பட்டது. நேற்று முன்தினம் நடைபெற்ற போட்டியில் அஜித்குமார் ரேசிங் அணி 991 பிரிவில் மூன்றாவது இடத்தை பிடித்து சாதனை படைத்தது. இந்த வெற்றியை தேசியக் கொடியை ஏந்தி உற்சாகத்துடன் அஜித் கொண்டாடினார். இந்த வீடியோ சமூக வலைத்தளங்களில் வேகமாக வைரலான நிலையில் பங்கேற்ற முதல் போட்டியிடையே இந்த சாதனையை படைத்துள்ளதால் நடிகர் அஜித்துக்கும் அவருடைய அணியினருக்கும் பிரபலங்கள் பலரும் வாழ்த்து தெரிவித்து வருகிறார்கள். இந்நிலையில் இந்திய பாக்சர் மற்றும் ஒலிம்பியனான தேவராஜன் அஜித்துக்கு வாழ்த்து தெரிவித்து வீடியோ ஒன்றை வெளியிட்டுள்ளார்.

அந்த வீடியோவில், கார் ரேஸ் என்பது எவ்வளவு கஷ்டமான விஷயம் என்பது அனைவருக்கும் தெரியும். இதில் நடிகர் அஜித் தனது அணியுடன் கலந்து கொண்டு மூன்றாவது இடத்தை பிடித்துள்ளது பெருமைக்குரியது. அதிலும் குறிப்பாக அவர் விபத்தில் சிக்கிய வீடியோ வெளியானது அதிர்ச்சியை ஏற்படுத்தியது. பாக்ஸிங் செய்வதை விட கார் ரேஸ் ரொம்ப கஷ்டமானது என்பதை அன்னைக்கு தெரிந்து கொண்டேன். கண்ணிமைக்கும் வேகத்தில் கார் ரேஸ் நடக்கும். இதில் அஜித் கலந்து கொண்டது பெருமை. அவருக்கு குத்துச்சண்டை வீரர்கள் சார்பாகவும் இந்திய விளையாட்டு வீரர்கள் சார்பாகவும் வாழ்த்துக்களை தெரிவித்துக் கொள்கிறேன். அவருடைய வெற்றிக்கு உறுதுணையாக இருந்த குடும்பத்தினருக்கும் வாழ்த்துக்கள் என பேசி வீடியோ வெளியிட்டுள்ளார்.