மனிதநேயம் எங்கே போனது…? திருமண ஊர்வலத்தில் குதிரை மீது… நடத்தப்பட்ட கொடூர தாக்குதல்… வைரலாகும் அதிர்ச்சி வீடியோ…!!

இந்தூர் மாவட்டம் கம்பேல் பகுதியில் உள்ள ஒரு திருமண ஊர்வலத்தின் போது, குதிரை ஒன்று நடனமாட மறுத்ததால் அதன் உரிமையாளர் அதை ஒரு தடியால் கொடூரமாக அடிக்கும் அதிர்ச்சியூட்டும் வீடியோ சமூக வலைத்தளங்களில் வெளியாகி பெரும் பரபரப்பை ஏற்படுத்தியுள்ளது. அந்த வீடியோவில், சுற்றியுள்ள மக்கள் சத்தமாக இசைத்துக் கொண்டிருக்கும் போது, அந்த நபர் விலங்கு என்றும் பாராமல் அதன் கால்கள் மற்றும் உடம்பில் இரக்கமின்றி தாக்குவதை மக்கள் வேடிக்கை பார்த்துக் கொண்டிருக்கிறார்கள்.

இந்தக் கொடூரமானத் தாக்குதலால் குதிரை வலியால் துடிப்பதைக் கண்ட விலங்கு நல ஆர்வலர்கள் மற்றும் பொதுமக்கள் கடும் அதிர்ச்சியும் கோபமும் அடைந்துள்ளனர். “பீப்பிள் ஃபார் அனிமல்ஸ்” போன்ற முக்கிய விலங்கு நல அமைப்புகள் மற்றும் சமூக ஆர்வலர்கள், இந்தச் செயலைச் செய்த நபர் மீது கடுமையான சட்டப்பூர்வ நடவடிக்கை எடுக்க வேண்டும் என்றும், விலங்கு வதைத் தடுப்புச் சட்டத்தின் கீழ் அவரை உடனடியாகக் கைது செய்ய வேண்டும் என்றும் காவல்துறையிடம் வலியுறுத்தியுள்ளனர்.

திருமணங்கள் மற்றும் பொது விழாக்களில் விலங்குகளை இது போன்ற வணிக மற்றும் பொழுதுபோக்கு நோக்கங்களுக்காகப் பயன்படுத்துவதை முற்றிலும் தடை செய்ய வேண்டும் என்ற கோரிக்கையும் வலுத்து வருகிறது. ஊர்வலங்களில் அதிக சத்தம் கொண்ட டிஜே இசையமைப்புகள் மற்றும் பட்டாசுகள் ஏற்கனவே விலங்குகளுக்கு மிகுந்த மன அழுத்தத்தை ஏற்படுத்துவதாகவும், அதோடு இது போன்ற உடல் ரீதியான சித்திரவதைகளும் இணைவது மனிதநேயமற்ற செயல் என்றும் சமூக வலைத்தளங்களில் மக்கள் தங்களின் கண்டனங்களைப் பதிவு செய்து வருகின்றனர்.