“இப்படிப்பட்டவர்களை சும்மா விடாதீங்க” ரயிலில் நடந்த அந்த மோசமான சம்பவம்… துணிச்சலாக இளம்பெண் செய்த காரியம்.. வைரலாகும் வீடியோ..!

“இந்தியாவில் பெண்களுக்கு எங்குமே பாதுகாப்பு இல்லை” என்ற கசப்பான உண்மையைப் பகிரும் வகையில், சமீபத்தில் ரயில் பயணத்தின் போது இளம்பெண் ஒருவர் எதிர்கொண்ட அதிர்ச்சிகரமான அனுபவம் சமூக வலைதளங்களில் விவாதத்தைக் கிளப்பியுள்ளது. ஒரு பெண்ணை மலிவான எண்ணத்துடன் உற்றுப் பார்ப்பதோ அல்லது அனுமதியின்றித் தொடுவதோ வன்கொடுமை என்பதைச் சில ஆண்கள் எப்போது புரிந்து கொள்வார்கள் என்கிற ஆதங்கத்துடன் இந்தச் செய்தி பகிரப்பட்டு வருகிறது.

பாதிக்கப்பட்ட அந்தப் பெண், தனது 13 மணி நேர ரயில் பயணத்தின் போது பக்கத்து இருக்கையில் அமர்ந்திருந்த நபர், தன்னைத் தொடர்ச்சியாக அசௌகரியமான முறையில் உற்றுப் பார்த்துக் கொண்டே இருந்ததாகத் தெரிவித்துள்ளார். அந்நபரின் பார்வை எல்லை மீறியதால் மிகுந்த மன உளைச்சலுக்கு ஆளான அந்தப் பெண், துணிச்சலாகத் தனது மொபைல் கேமராவை ஆன் செய்து அவரை வீடியோ எடுக்கத் தொடங்கினார்.

கேமராவைக் கண்டதும் தான் செய்து கொண்டிருந்த தவறை உணர்ந்த அந்த நபர், உடனடியாகப் பதற்றமடைந்து தனது இருக்கையை விட்டு எழுந்து அங்கிருந்து சென்றுவிட்டார். “சில நேரங்களில் உங்களுக்காக நீங்களே தான் எழுந்து நிற்க வேண்டும்” என்று அந்தப் பெண் தனது பதிவில் குறிப்பிட்டுள்ளார். இந்தச் சம்பவம், பொது இடங்களில் பெண்களுக்கு எதிரான இத்தகைய அநாகரிகச் செயல்களைத் தட்டிக்கேட்க வேண்டிய அவசியத்தை மீண்டும் ஒருமுறை வலியுறுத்தியுள்ளது.