“602 சதுர கி.மீ நிலம்… அடம்பிடிக்கும் இஸ்ரேல்”… அமெரிக்கா – ஈரான் போட்ட 60 நாள் பிளான் காலி?… வெடிக்கக் காத்திருக்கும் அடுத்த உலகப்போர்…!

அமெரிக்கா மற்றும் ஈரான் இடையே நீண்டகாலப் பகைக்கு முற்றுப்புள்ளி வைக்க திட்டமிடப்பட்டுள்ள அமைதிப் பேச்சுவார்த்தையில், தற்போதைய ஆகப்பெரும் முட்டுக்கட்டையாக இஸ்ரேல் உருவெடுத்துள்ளது. இந்த பிராந்திய மோதலில் ஈரானின் ஒட்டுமொத்த ராணுவ வலிமையைக் குறைப்பதோடு, லெபனானில் ஈரானின் முக்கிய ஆதரவுப் படையான ஹிஸ்புல்லா அமைப்பை முழுமையாக ஒழித்துக்கட்ட வேண்டும் என்பதில் இஸ்ரேல் உறுதியாக உள்ளது. இதன் காரணமாகவே, லெபனானின் தலைநகரான பெய்ரூட் வரை இஸ்ரேல் தீவிரத் தாக்குதல்களை நடத்தி வருகிறது. தற்போதைய அமைதி ஒப்பந்தத்தின் மூலம் தங்களின் இந்த இரண்டு இலக்குகளும் நிறைவேறாது என்பதால், இஸ்ரேல் தொடர்ந்து முரண்டு பிடித்து வருகிறது.

சமீபத்தில் ஜெனிவாவில் அமெரிக்கா மற்றும் ஈரான் நாடுகளுக்கு இடையே 12 மணிநேரத்திற்கும் மேலாக நீடித்த தீவிரக் கூட்டத்தின் இறுதியில், ஒரு முக்கிய முடிவு எட்டப்பட்டது. அதன்படி, இஸ்ரேல் ராணுவம் தெற்கு லெபனானில் இருந்து முழுமையாக வெளியேற வேண்டும் என்ற முதன்மை இலக்குடன் ‘லெபனான் டிகிளிக்ட்ஷன் செல்’ உருவாக்கப்பட்டது. ஆனால், இதற்கு மிகக் கடுமையான பதிலடி கொடுத்துள்ள இஸ்ரேல் பிரதமர் பெஞ்சமின் நெதன்யாகு, தெற்கு லெபனானில் இருந்து இஸ்ரேல் ராணுவம் எக்காரணம் கொண்டும் வெளியேறாது என திட்டவட்டமாக அறிவித்துள்ளார். இத்தீர்மானம், அமெரிக்கா – ஈரான் இடையே எட்டப்பட்ட 60 நாள் அமைதி ஒப்பந்தப் பாதையை தொடங்குவதற்கு முன்பே கடுமையாகப் பாதிக்கும் சூழலை உருவாக்கியுள்ளது.

இதுகுறித்து இஸ்ரேல் பிரதமர் பெஞ்சமின் நெதன்யாகு கூறுகையில், தெற்கு லெபனானில் உருவாக்கப்பட்டுள்ள பாதுகாப்பு மண்டலத்தில் தங்களின் ராணுவம் தேவைப்படும் வரை தங்கியிருக்கும் என்று தெளிவாகத் தெரிவித்துள்ளார். இது தங்களின் வடக்கு எல்லைப் பகுதியில் வசிக்கும் இஸ்ரேல் மக்களையும், ஒட்டுமொத்த நாட்டின் குடிமக்களையும் பாதுகாப்பதற்காக எடுக்கப்பட்ட தவிர்க்க முடியாத முடிவு என்று அவர் நியாயப்படுத்தியுள்ளார். அத்தோடு நிறுத்திவிடாமல், ஈரான் அணு ஆயுதங்களைத் தயாரிப்பதை இஸ்ரேல் ஒருபோதும் அனுமதிக்காது என்றும், அதைத் தடுப்பதற்குத் தேவையான அனைத்து அக்கிரமமான நடவடிக்கைகளையும் தங்களின் ராணுவம் எடுக்கும் என்றும் அவர் உறுதியளித்துள்ளார்.

தற்போது இஸ்ரேல் ராணுவத்தின் கட்டுப்பாட்டில் உள்ள இந்த பாதுகாப்பு மண்டலம் சுமார் 602 சதுர கிலோமீட்டர் (230 சதுர மைல்) பரப்பளவைக் கொண்டது. இது லெபனான் நாட்டின் மொத்த நிலப்பரப்பில் சுமார் 6 விழுக்காடு (6%) ஆகும். இந்த எல்லையோரப் பகுதியைத் தங்களின் முழுக் கட்டுப்பாட்டில் வைத்திருப்பதன் மூலமே, ஈரானின் ஆதரவுப் படைகள் இஸ்ரேலின் வடக்கு எல்லையை நோக்கி நகர்வதைத் தடுக்க முடியும் என்பது இஸ்ரேல் தரப்பின் விளக்கமாக உள்ளது. ஆனால், தெற்கு லெபனானில் இருந்து இஸ்ரேல் முழுமையாக விலக வேண்டும் என்பதில் ஈரான் பிடிவாதமாக இருப்பதால், நெதன்யாகுவின் இந்த அதிரடி அறிவிப்பு ஒட்டுமொத்த அமைதிப் பேச்சுவார்த்தையையும், அடுத்தகட்ட முன்னேற்றத்தையும் பெரும் கேள்விக்குறியாக்கியுள்ளது.