தமிழக வெற்றிக் கழகத்தின் முக்கிய நிர்வாகிகள் தரப்பிலிருந்து வந்துள்ள இந்த விமர்சனம், நாம் தமிழர் கட்சியை முற்றிலுமாக நிராகரிக்கும் வகையில் அமைந்துள்ளது. “நாங்கள் உயரத்தில் இருக்கிறோம், அவர்கள் பள்ளத்தில் இருக்கிறார்கள்; அவர்களை ஒரு பொருட்டாகவே நாங்கள் கருதவில்லை” என்று தவெக தரப்பில் மிகக் கடுமையான கருத்துக்கள் முன்வைக்கப்பட்டுள்ளன. குறிப்பாக, நடிகர் விஜய் அரசியல் பயணத்தைத் தொடங்கிய பிறகு, நாம் தமிழர் கட்சியின் தம்பிகள் தங்களது உண்மையான தலைவன் விஜய் தான் என்பதை உணர்ந்து தவெக-வை நோக்கி வரத் தொடங்கிவிட்டதாகவும், அந்த ஏமாற்றத்திலும் ஆத்திரத்திலும்தான் சீமான் தரப்பினர் வன்முறையில் ஈடுபடுவதாகவும் குற்றம் சாட்டப்பட்டுள்ளது.
மேலும், நாம் தமிழர் கட்சி என்பது ஒரு மாயையான பிம்பம் என்றும், விஜய் செல்லும் இடமெல்லாம் அந்தக் கட்சி காணாமல் போய்விடும் என்றும் தவெகவினர் சாடியுள்ளனர். “தேர்தல் முடியும் வரை நாம் தமிழர் கட்சி இருக்குமா என்பதே கேள்விக்குறிதான்” என்று கூறியுள்ள அவர்கள், நாம் தமிழர் கட்சி அழிவை நோக்கிச் செல்வதாகவும் கணித்துள்ளனர். நாம் தமிழர் தம்பிகளைத் திருப்பித் தாக்குவது தங்களின் நோக்கமல்ல என்று கூறும் தவெக, அந்தக் கட்சி தங்களுக்கு ஒரு போட்டியே அல்ல என்ற தொனியில் பேசியிருப்பது அரசியல் வட்டாரத்தில் பெரும் விவாதத்தை ஏற்படுத்தியுள்ளது.