மும்பையில் ஓலா கார் ஓட்டுநராகப் பணியாற்றி வரும் மீர் ஷைக் என்பவரின் நேர்மையான செயல் இணையவாசிகளின் இதயங்களை வென்றுள்ளது. பாந்த்ரா குர்லா காம்ப்ளக்ஸ் பகுதியில் தனது சவாரியை முடித்த மீர் ஷைக், காரின் பின்சீட்டில் விலையுயர்ந்த ஐபோன் 16 கைப்பேசி ஒன்று தவறிக்கிடப்பதைக் கண்டுள்ளார். உடனடியாக உரிமையாளரைத் தொடர்புகொள்ள இயலாத நிலையில், அதை மிகவும் பாதுகாப்பாகத் தன்வசம் வைத்துக்கொண்டார். சற்று நேரத்தில் அந்தச் செல்போனுக்கு அழைப்பு வந்தபோது, அதைத் தவறவிட்ட முதியவர் மலபார் ஹில் பகுதியில் இருப்பதை அறிந்தார். சற்றும் தயங்காமல், உடனடியாக மலபார் ஹில் பகுதிக்குக் காரைச் செலுத்திச் சென்று, அந்த ஐபோனை உரியவரிடம் பத்திரமாக ஒப்படைத்தார்.
https://www.instagram.com/reel/Db2-m-lub6L/?utm_source=ig_embed&ig_rid=ASyja8FNfgKgjL9PDjQC5SL
யாருமே பார்க்காத நிலையிலும் நேர்மையைக் கடைப்பிடிக்க வேண்டும் என்ற தனது எண்ணத்திற்குச் சான்றாக இந்தச் சம்பவம் அமைந்துள்ளதாகக் கூறி மீர் ஷைக் மகிழ்ச்சி தெரிவித்தார். ஓட்டுநரின் இந்த உயரிய பண்பையும் நேர்மையையும் கண்டு நெகிழ்ந்துபோன அந்த முதியவர், அவருக்குப் பாராட்டுத் தெரிவிக்கும் விதமாக ₹2,500 ரூபாயைப் பரிசாக வழங்கினார். இச்சம்பவம் குறித்த வீடியோ சமூக வலைதளங்களில் வெளியாகித் தீயாய் பரவி வருகிறது. இதைப் பார்த்த பல்லாயிரக்கணக்கான இணையவாசிகள், “மனிதநேயம் இன்னும் உயிர்ப்போடுதான் இருக்கிறது” என்று நெகிழ்ச்சியோடு கூறி, ஓட்டுநர் மீர் ஷைக்கின் இந்த முன்மாதிரியான செயலை வெகுவாகப் பாராட்டி வருகின்றனர்.