ஆந்திர மாநிலம் ஸ்ரீகாகுளம் மாவட்டம் சிலகபாலம் அருகே நிகழ்ந்த கோர விபத்தில் தாய் மற்றும் மகன் ஆகிய இருவர் சம்பவ இடத்திலேயே பரிதாபமாக உயிரிழந்தனர். விசாகப்பட்டினத்தைச் சேர்ந்த நாகமணி (59) மற்றும் அவரது மகன் நரேந்திர குமார் (32) ஆகியோர் இருசக்கர வாகனத்தில் சென்றுகொண்டிருந்தபோது, சாலையோரம் நிறுத்தப்பட்டிருந்த லாரியின் பின்புறத்தில் எதிர்பாராதவிதமாக அதிவேகமாக மோதினர். இந்த விபத்தின் வேகம் மிக அதிகமாக இருந்ததால், இருவரும் பலத்த காயமடைந்து அவ்விடத்திலேயே உயிரிழந்தனர்.
இந்த விபத்து தொடர்பான சிசிடிவி காட்சிகள் தற்போது வெளியாகி சமூக வலைதளங்களில் பெரும் பரபரப்பையும் அதிர்ச்சியையும் ஏற்படுத்தியுள்ளது. அதிவேகமாக வந்த இருசக்கர வாகனம் கண்ணிமைக்கும் நேரத்தில் லாரியின் அடியில் சிக்கிய அந்த காட்சிகள் காண்போரை நிலைகுலையச் செய்கின்றன. இச்சம்பவம் குறித்து வழக்குப் பதிவு செய்துள்ள காவல்துறையினர், விபத்துக்கான காரணம் குறித்தும், சாலையோரம் லாரி நிறுத்தப்பட்டிருந்தது விதிமீறலா என்பது குறித்தும் தீவிர விசாரணை நடத்தி வருகின்றனர்.