“பழசு வேணாம் இனி எல்லாம் புதுசு தான்…” 60 ஆண்டு கால பாரம்பரியத்துக்கு குட் பை… ரெடியாகும்… CM சி. ஜோசப் விஜய்யின் இன்டர்நேஷனல் ஸ்டைல் சூப்பர் ஆபீஸ்… அதிரடி மாற்றம்…!

தமிழகத்தின் நிர்வாக வரலாற்றில் முதல்முறையாக, முதலமைச்சர் சி. ஜோசப் விஜய்யின் தலைமை அலுவலகம் புனித ஜார்ஜ் கோட்டையில் இருந்து நாமக்கல் கவிஞர் மாளிகையின் 10-வது மாடிக்கு மாற்றப்படவுள்ளது. கடந்த 60 ஆண்டுகளுக்கும் மேலாகத் தமிழக முதலமைச்சர்கள் கோட்டையின் பிரதான பாரம்பரிய கட்டிடத்தின் முதல் தளத்தில் இருந்தே ஆட்சிப் பணிகளைக் கவனித்து வந்த நிலையில், அந்த நீண்டகால நடைமுறை தற்போது மாற்றப்படுகிறது. கட்டமைப்பு மற்றும் நவீன உள்அலங்காரப் பணிகள் தீவிரமாக நடந்து வரும் இந்த அலுவலக மாற்றம், வரும் ஆகஸ்ட் மாத நடுப்பகுதியில் அதிகாரப்பூர்வமாக நிறைவடையும் எனத் தலைமைச் செயலக வட்டாரங்கள் உறுதிப்படுத்தியுள்ளன.

இந்த இடமாற்றம் முற்றிலும் ஒரு நவீன நிர்வாகச் சீர்திருத்த நடவடிக்கையாகவே பார்க்கப்படுகிறது. நாமக்கல் கவிஞர் மாளிகையின் 10-வது மாடியில் இதுவரை உயர் அதிகாரிகளின் மாநாடுகள் நடத்தப்பட்ட பெரிய அரங்கம் மற்றும் உணவகம் ஆகியவை, தற்போது சர்வதேசத் தரத்திலான அதிநவீன முதலமைச்சர் அலுவலகமாக மறுவடிவமைப்பு செய்யப்பட்டு வருகின்றன. முதலமைச்சர், முதன்மைச் செயலாளர்கள் மற்றும் முக்கிய ஆலோசகர்கள் என அனைவரும் ஒரே தளத்தில் அமர்ந்து தடையின்றி ஆலோசனைகளை மேற்கொள்ளும் வகையில் இந்த அலுவலகம் உருவாக்கப்பட்டு வருவது குறிப்பிடத்தக்கது.

புதியதாக அமைக்கப்படும் இந்தத் தளமானது வங்காள விரிகுடாவின் அழகிய கடல் காட்சியைக் தடையின்றிப் பார்க்கும் சிறப்பு வசதியைக் கொண்டுள்ளது. ஆன்மீகக் காரணங்களை விடுத்து, முற்றிலும் நிர்வாக வசதியையும் நவீன தொழில்நுட்பத் தேவைகளையும் முன்னிறுத்தி இந்த நடவடிக்கை எடுக்கப்பட்டுள்ளது. இருப்பினும், வரலாற்றுச் சிறப்புமிக்க சில அமைச்சரவைக் கூட்டங்கள் மற்றும் முக்கிய நிகழ்வுகளுக்கு மட்டும் பழைய கோட்டை அறையை முதலமைச்சர் தொடர்ந்து பயன்படுத்துவார் என்றும் அதிகாரிகள் தரப்பில் தெரிவிக்கப்பட்டுள்ளது.