”ஊழல் செய்தால் மரண தண்டனை…. சிங்கப்பூர் மாடலை கையில் எடுங்க” … முதல்வர் விஜய்க்கு சோஹோ ஸ்ரீதர் வேம்பு கொடுத்த அதிரடி ஐடியா…. அதிர்ந்த தமிழகம்….!

தமிழகத்தில் போதைப்பொருள் புழக்கத்தைக் கட்டுப்படுத்தவும், லஞ்ச ஊழலை முற்றிலும் ஒழிக்கவும் சிங்கப்பூர் நாட்டின் கடுமையான சட்டங்களைப் பின்பற்ற வேண்டும் என சோஹோ (Zoho) நிறுவனத் தலைவர் ஸ்ரீதர் வேம்பு வலியுறுத்தியுள்ளார். முதலமைச்சர் தலைமையில் இயங்கும் புதிய தமிழக அரசுக்கு, சமூக வலைதளமான எக்ஸ் (X) தள வாயிலாக அவர் இந்த முக்கிய ஆலோசனையை முன்வைத்துள்ளார்.

ஸ்ரீதர் வேம்பு தனது பதிவில், சிங்கப்பூரில் போதைப்பொருள் கடத்தல் மற்றும் கடுமையான ஊழல் குற்றங்களுக்கு மரண தண்டனை வரை மிகக் கடுமையான தண்டனைகள் விதிக்கப்படுவதை சுட்டிக்காட்டியுள்ளார். அங்கு இத்தகைய சட்டங்கள் எவ்வித தயக்கமுமின்றி உறுதியாகச் செயல்படுத்தப்படுவதாலேயே, நாட்டின் நிர்வாகம் மிகவும் நேர்மையாகவும் போதைப்பொருளற்ற சூழலிலும் இயங்குகிறது என அவர் குறிப்பிட்டுள்ளார்.

மேலும், அரசு நிர்வாகத்தில் ஊழலைத் தடுக்க உயர்மட்ட அதிகாரிகளான ஐஏஎஸ், ஐபிஎஸ் அலுவலர்கள் மற்றும் அமைச்சர்களின் ஊதியத்தை வெகுவாக உயர்த்த வேண்டும் என்றும் அவர் யோசனை தெரிவித்துள்ளார். முறையான ஊதிய உயர்வும், இனிவரும் காலங்களில் ஊழலில் ஈடுபடுபவர்களுக்கு மரண தண்டனை போன்ற கடுமையான தண்டனைகளும் அமல்படுத்தப்பட்டால் மட்டுமே லஞ்சத்தை முற்றிலுமாகக் கட்டுப்படுத்த முடியும் என்பது அவரது பார்வையாகும்.

கடந்த காலத் தவறுகளைப் பற்றி விவாதித்து நேரத்தை வீணடிப்பதைத் தவிர்க்க, பழைய குற்றங்களுக்குச் சில நிபந்தனைகளுடன் கூடிய பொது மன்னிப்பு அறிவிக்கப்படலாம் என்றும் அவர் கூறியுள்ளார். சிங்கப்பூர் நாட்டின் முன்னாள் பிரதமர் லீ குவான் யூவின் தொலைநோக்கு பார்வையை மேற்கோள்காட்டிய அவர், சிங்கப்பூர் நீதிமன்றங்களின் திறமையான செயல்பாடுகளிலிருந்து தமிழக அரசு பல பாடங்களைக் கற்றுக்கொண்டு செயல்படுத்த வேண்டும் என வேண்டுகோள் விடுத்துள்ளார்.