“பார்ட் டைம் முதல்வர்.. ஃபுல் டைம் கன்டென்ட் கிரியேட்டர்”…. ஐசியூவில் சட்டம் ஒழுங்கு.. கோமாவில் ஆட்சி நிர்வாகம்… விஜய்யை விளாசிய ஸ்டாலின்….!

தமிழகத்தில் தீபாவளித் திருநாளன்று ஒரே நாளில் அடுத்தடுத்து அரங்கேறிய படுகொலை சம்பவங்களும், ஆளுங்கட்சி பிரதிநிதிகள் மீது எழுந்துள்ள அதிர்ச்சிகரமான குற்றச்சாட்டுகளும் மாநிலத்தின் சட்டம்-ஒழுங்கு நிலை குறித்த பெரும் கேள்விகளை எழுப்பியுள்ளன. குறிப்பாக, தேனியில் பட்டாசு வெடித்ததைத் தட்டிக் கேட்ட உதவி சப்-இன்ஸ்பெக்டர் உட்பட மாநிலம் முழுவதும் ஒரே நாளில் 15 முதல் 17 பேர் வரை கொல்லப்பட்ட சம்பவம் ஒட்டுமொத்த மக்களையும் அதிர்ச்சியில் ஆழ்த்தியுள்ளது. இந்தச் சூழலில், காவல்துறையினருக்கே பாதுகாப்பற்ற ஒரு சூழ்நிலை நிலவுவது பொதுமக்கள் மத்தியில் அச்சத்தை ஏற்படுத்தியுள்ளது.

இந்த கோரச் சம்பவங்களைச் சுட்டிக்காட்டி தமிழக முன்னாள் முதலமைச்சரும், திமுக தலைவருமான மு.க.ஸ்டாலின் தனது சமூக வலைதளப் பக்கத்தில் தமிழக அரசை மிகக் கடுமையாக விமர்சித்துள்ளார். “சட்டம்-ஒழுங்கு ஐசியூவிலும், ஆட்சி நிர்வாகம் கோமாவிலும் உள்ளது” என்று குறிப்பிட்ட அவர், “பகுதிநேர முதல்வராகவும், முழுநேர கன்டென்ட் கிரியேட்டராகவும் செயல்படும் தவெக தலைவர் விஜய்க்கு மக்கள் நலன் மீதும், நிர்வாகத்தின் மீதும் எந்தவிதப் பொறுப்பும் இல்லை” என்று குற்றம்சாட்டியுள்ளார். மேலும், இந்த ‘சோப்ளாங்கி ஆட்சியில்’ குற்றவாளிகளுக்குச் சட்டத்தின் மீது பயம் போய்விட்டதாக அவர் சாடியுள்ளார்.

சட்டம்-ஒழுங்கு சீர்கேடு ஒருபுறம் இருக்க, தவெகவைச் சேர்ந்த மக்கள் பிரதிநிதிகள் மீது அடுத்தடுத்து எழுந்த பகீர் புகார்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. தவெக எம்.எல்.ஏவும், சட்டப்பேரவைத் துணை சபாநாயகருமான ரவிசங்கர் தன்னிடம் மனு அளிக்க வந்த சாமானியர் ஒருவரைத் தாக்கி கொலை மிரட்டல் விடுத்ததாகக் கூறப்பட்ட விவகாரம் அடங்குவதற்குள், கள்ளக்குறிச்சி தவெக எம்.எல்.ஏ அருள் விக்னேஷ், மாவட்ட ஆட்சியர் பத்மஜாவுக்கு ஆபாசக் குறுஞ்செய்தி அனுப்பியதாகவும், போதையில் அவரது வீட்டுக்குச் சென்று தொந்தரவு செய்ததாகவும் எழுந்துள்ள புகார் தமிழக அரசியலில் புயலைக் கிளப்பியுள்ளது.

ஆளுங்கட்சி மக்கள் பிரதிநிதிகளின் இத்தகைய ஒழுங்கீனச் செயல்களுக்கு எதிர்க்கட்சிகள் கடுமையான கண்டனங்களைப் பதிவு செய்துள்ளன. குறிப்பாக, அதிமுக பொதுச்செயலாளர் எடப்பாடி பழனிசாமி தனது கண்டனப்பதிவில், “பெண் மாவட்ட ஆட்சியருக்கே ஆபாசச் செய்தி அனுப்பப்பட்டால், மாநிலத்தில் நிர்வாக நீதிபதிக்கே நீதி இல்லை” என்று விஜய் அரசை விளாசியுள்ளார். தவெக சட்டமன்ற உறுப்பினர்களுக்கு எந்தவிதக் கட்டுப்பாடும் இல்லை என்றும், சட்டப்பேரவைத் துணைத் தலைவர் பதவியின் மாண்பு குழிதோண்டிப் புதைக்கப்பட்டுள்ளதாகவும் எதிர்க்கட்சித் தலைவர்கள் குற்றம்சாட்டி வருகின்றனர்.

தொடர்ச்சியாக எழும் குற்றச்சாட்டுகளும், சட்டம்-ஒழுங்கு சீர்குலைவுச் சம்பவங்களும் தற்போதைய தவெக அரசாங்கத்தின் நிர்வாகத் திறமையின்மையைக் காட்டுவதாக அரசியல் விமர்சகர்கள் கருதுகின்றனர். காவல்துறைக்கு முழு சுதந்திரம் அளித்து, குற்றவாளிகள் மீது கடுமையான நடவடிக்கை எடுக்கப்படாவிட்டால் பொதுமக்கள் மத்தியில் அரசுக்கு எதிரான அதிருப்தி மேலும் அதிகரிக்கும். எனவே, முதல்வர் விஜய் உடனடியாகத் தலையிட்டு, சட்டம்-ஒழுங்கை மீட்டெடுப்பதோடு, ஒழுக்கக்கேடான செயல்களில் ஈடுபடும் மக்கள் பிரதிநிதிகள் மீது கடுமையான சட்டப்பூர்வ நடவடிக்கைகளை எடுக்க வேண்டும் என்பதே அனைவரின் எதிர்பார்ப்பாக உள்ளது.