முதல்வர் விஜய்-ஆ? ஸ்டாலினா? மேடையில் குழம்பிய அமைச்சர்.. பதறிப்போன தவெக நிர்வாகிகள்…. திடீரென மேடையில் நேர்ந்த ட்விஸ்ட்…!

தமிழக முதல்வரும், தமிழக வெற்றிக் கழகத்தின் தலைவருமான விஜய்யின் 52-வது பிறந்தநாள் மற்றும் காங்கிரஸ் தலைவர் ராகுல் காந்தியின் 59-வது பிறந்தநாளை முன்னிட்டு மாநிலம் முழுவதும் பல்வேறு கொண்டாட்டங்கள் நடைபெற்று வருகின்றன. இதன் ஒரு பகுதியாக, மதுரை மாவட்டம் மேலூரில் “போதை இல்லா தமிழகம்” மற்றும் “பெண்கள் பாதுகாப்பு” குறித்த விழிப்புணர்வை வலியுறுத்தி பிரம்மாண்ட மாரத்தான் போட்டி நடைபெற்றது. மேலூர் அரசு ஆண்கள் மேல்நிலைப் பள்ளியில் தொடங்கிய இந்த ஓட்டப் பந்தயத்தை, மேலூர் தொகுதி சட்டமன்ற உறுப்பினரும், உயர் கல்வித் துறை அமைச்சருமான விஸ்வநாதன் தொடங்கி வைத்தார்.

இந்த நிகழ்ச்சியின் போது மேடையில் பேசிய அமைச்சர் விஸ்வநாதன், வரலாற்றுச் சிறப்புமிக்க 2026 சட்டமன்றத் தேர்தல் வெற்றியைப் பற்றிக் குறிப்பிட்டார். அவர் பேசுகையில், “தமிழகத்தில் அமைந்துள்ள 17 ஆவது சட்டமன்ற அமைச்சரவையில், 1967 மற்றும் 1977-க்குப் பிறகு, 2026ல் சட்டமன்றத் தேர்தலில் வெற்றி பெற்று முதல்வராக உள்ள தளபதி ஸ்டாலின் அவர்கள் நல்லாட்சி வழங்க வாழ்த்துகிறேன்” என்று கூறினார். முதல்வர் விஜய் என்பதற்குப் பதிலாக, ‘முதல்வர் தளபதி ஸ்டாலின்’ என்று அவர் வாய் தவறிப் பேசியது அங்கிருந்தவர்களிடையே பெரும் அதிர்ச்சியை ஏற்படுத்தியது.

அமைச்சர் அவ்வாறு பேசிய அடுத்த கணமே, மேடையில் அருகில் இருந்த தவெக நிர்வாகிகள் மற்றும் முக்கியப் பிரமுகர்கள் பதற்றமடைந்து, அவரிடம் “முதல்வர் விஜய்” என்று சுட்டிக்காட்டினர். உடனடியாகத் தனது தவறை உணர்ந்த அமைச்சர் விஸ்வநாதன், சமயோசிதமாகத் தனது பேச்சைத் திருத்திக் கொண்டு மீண்டும் உரையைத் தொடர்ந்தார். இருப்பினும், அமைச்சர் வாய் தவறிப் பேசிய இந்த குறிப்பிட்ட பகுதி மட்டும் வீடியோவாகப் பதிவு செய்யப்பட்டு, தற்போது சமூக வலைத்தளங்களில் காட்டுத்தீயாய் பரவி அரசியல் வட்டாரத்தில் பெரும் விவாதப் பொருளாக மாறியுள்ளது.

முன்னதாக, இந்த விழா மேடையில் திராவிட மற்றும் தவெக அரசியல் நாகரிகங்களைத் தாண்டி, மற்றொரு சுவாரசியமான சர்ச்சையும் வெடித்தது. விழா மேடையில் ஒலிபரப்பப்பட்ட விஜய்யின் புகழ்பெற்ற சினிமா பாடல்களான ‘வாடி வாடி கைப்படாத சீடி’ மற்றும் ‘தளபதி கச்சேரி’ போன்ற பாடல்களுக்கு அமைச்சர் விஸ்வநாதன் மற்றும் தவெக நிர்வாகிகள் சிலர் உற்சாகமாக மேடையில் நடனமாடினர். பொறுப்பான அமைச்சர் ஒருவர் தவெக நிர்வாகிகளுடன் இணைந்து சினிமா பாடலுக்கு நடனமாடியதும், தொடர்ந்து மேடையில் முதல்வர் பெயரை மாற்றிக் கூறியதும் இணையவாசிகளிடையே தற்போதைய ஹாட் டாப்பிக்காக நகர்ந்து கொண்டிருக்கிறது.