“10 நாள்ல ஆட்டம் க்ளோஸ்… டாஸ்மாக் முறைகேடுகளுக்கு முற்றுப்புள்ளி வைக்கும் அமைச்சர் விக்னேஷ்.. ஷாக்கில் ஊழியர்கள்”..!!

தமிழகத்தில் உள்ள டாஸ்மாக் மதுபானக் கடைகளில் அரசு நிர்ணயித்த விலையைத் தாண்டி (MRP), ஒவ்வொரு பாட்டிலுக்கும் கூடுதலாக 10 ரூபாய் வசூலிக்கப்படும் விவகாரம் நீண்ட காலமாகவே பெரும் சர்ச்சையை ஏற்படுத்தி வருகிறது. தவெக தலைவர் விஜய் தனது தேர்தல் பிரச்சாரத்தின் போதே இந்த 10 ரூபாய் கூடுதல் வசூலை கடுமையாக விமர்சித்துப் பேசியிருந்தார். இருப்பினும், தவெக ஆட்சி அமைந்த பிறகும் கூட இந்த கூடுதல் கட்டண வசூல் தொடர்வதாகப் புகார்களும், அது தொடர்பான வீடியோக்களும் வெளியாகி மக்கள் மத்தியில் விமர்சனங்களை எழுப்பியுள்ளன.

திண்டுக்கல் மாவட்டத்தின் பொறுப்பு அமைச்சராக நியமிக்கப்பட்டுள்ள மதுவிலக்குத் துறை அமைச்சர் விக்னேஷ், நேற்று அங்கு மக்களின் பிரச்சினைகளைக் கேட்டறிந்த போது இந்த டாஸ்மாக் விவகாரம் குறித்துக் கேள்வி எழுப்பப்பட்டது. அதற்கு பதிலளித்த அமைச்சர், “டாஸ்மாக் கடைகளில் கூடுதலாக 10 ரூபாய் வாங்குவது முற்றிலும் தடுத்து நிறுத்தப்படும்; எந்தவொரு தனிநபர் அல்லது தனிக்கட்சிக்கும் மக்கள் பணம் சென்று சேரக்கூடாது என்பதில் முதல்வர் உறுதியாக இருக்கிறார்” என்று தெரிவித்தார். மேலும், டாஸ்மாக்கில் உள்ள அனைத்து விற்பனையையும் முழுமையாக MRP விலைக்குள் கொண்டு வர தேவையான நடவடிக்கைகள் எடுக்கப்பட்டு வருவதாகவும் அவர் விளக்கமளித்தார்.

தமிழகத்தில் வரும் ஜூன் 18ஆம் தேதி சட்டசபைக் கூட்டத்தொடர் தொடங்க உள்ளதாக அறிவிக்கப்பட்டுள்ள சூழலில், அதற்கு முன்பாகவே இந்த டாஸ்மாக் கூடுதல் கட்டணப் பிரச்சினைக்குத் தீர்வு காண தேவையான நடவடிக்கைகள் எடுக்கப்படும் என அமைச்சர் விக்னேஷ் உறுதியளித்துள்ளார். மற்றவர்களை விமர்சிப்பது தனது நோக்கமல்ல என்றும், திண்டுக்கல் மாவட்டத்தின் வளர்ச்சி மற்றும் மக்களின் தேவைகளைச் சரிசெய்வதே தனது முக்கிய இலக்கு என்றும் குறிப்பிட்ட அவர், மிக விரைவில் இந்தச் சிக்கலுக்கு முற்றுப்புள்ளி வைக்கப்படும் எனத் திட்டவட்டமாகக் கூறியுள்ளார்.