தமிழக சட்டப்பேரவையில் மதுவிலக்கு மற்றும் ஆயத்தீர்வைத் துறை மானியக் கோரிக்கை மீதான விவாதத்தின் போது பேசிய அமைச்சர் கே.விக்னேஷ், தனது சொந்த வாழ்க்கைப் பின்னணியைப் பகிர்ந்து ஒட்டுமொத்த அவையையும் நெகிழ வைத்தார். “சிறுவயதில் மதுவின் பாதிப்பினால் நானும் என் தாயும் எண்ணற்ற கஷ்டங்களை அனுபவித்துள்ளோம். ஒரு வாய்ப்பு கிடைத்தால் அனைத்து மதுக்கடைகளையும் மூட வேண்டும் என சிறுவயதில் நினைத்ததுண்டு. ஆனால், இன்று அதே துறையை வழிநடத்தும் பொறுப்பு எனக்குக் கிடைத்திருப்பது காலத்தின் சூழலா அல்லது கடவுளின் கட்டளையா எனத் தெரியவில்லை” என்று அவர் உருக்கமாகத் தெரிவித்தார்.
உணர்ச்சிப்பூர்வமாகப் பேசியதுடன் நிறுத்தாமல், டாஸ்மாக் பணியாளர்களுக்கான முக்கிய நிர்வாகச் சீர்திருத்தங்களையும் அமைச்சர் அறிவித்தார். டாஸ்மாக் கடை மேற்பார்வையாளர்களுக்கு ரூ.33,023 வரையிலும், விற்பனையாளர்களுக்கு ரூ.30,284 வரையிலும், உதவி விற்பனையாளர்களுக்கு ரூ.28,680 வரையிலும் ஊதியம் உயர்த்தி வழங்கப்படுகிறது. பணியாளர்களின் மன அழுத்தத்தைக் குறைக்கும் வகையில் வாராந்திர விடுமுறை முறை அறிமுகப்படுத்தப்பட்டுள்ளது. மதுப்பிரியர்களிடம் கூடுதல் கட்டணம் வசூலித்தால் தற்காலிக சஸ்பெண்ட் மற்றும் பணிநீக்கம் போன்ற கடும் நடவடிக்கைகள் எடுக்கப்படும் என எச்சரித்துள்ளார்.