MRP ரூ.40.. ஆனால் விற்பனை ரூ.50.. ரயிலில் வியாபாரியின் பகீர் சர்வீஸ் சார்ஜ்… தட்டிக்கேட்ட பயணிக்குக் கிடைத்த அதிர்ச்சி பதில்..!!

கௌஹாத்தியில் இருந்து பெங்களூரு நோக்கிச் செல்லும் 12510 என்ற எண் கொண்ட விரைவு ரயிலில் நடந்த ஒரு சிறிய மோதல், ரயில்களில் நடக்கும் அன்றாடச் சுரண்டல்களை வெளிச்சம் போட்டுக் காட்டியுள்ளது. படுக்கை வசதி கொண்ட பெட்டியில் தின்பண்டங்களை விற்றுக்கொண்டிருந்த ஒரு வியாபாரி, 40 ரூபாய் அதிகபட்ச விற்பனை விலை (MRP) கொண்ட ஒரு கேக் பாக்கெட்டை 50 ரூபாய்க்கு விற்றுள்ளார். இது குறித்துப் பயணி ஒருவர் கேள்வி எழுப்பியபோது, “உங்களது இருக்கைக்கே வந்து வழங்கியதற்காக 10 ரூபாய் சேவைக் கட்டணம்” என்று அந்த வியாபாரி எவ்வித தயக்கமும் இன்றிப் பதிலளித்துள்ளார்.

விலைப்பட்டியலை (Bill) கேட்ட அந்தப் பயணியிடம், தனது குடும்பச் சூழ்நிலையைக் கூறி அந்த வியாபாரி உணர்ச்சிவசப்பட்டுப் பேசியுள்ளார். இருப்பினும், இது சட்டவிரோதமான செயல் என்றும், இது குறித்து ஐஆர்சிடிசி (IRCTC) அமைப்பிடம் புகார் அளிக்கப்போவதாகவும் அந்தப் பயணி உறுதியாகத் தெரிவித்துள்ளார். அதற்கு அந்த வியாபாரி கிண்டலாகச் சிரித்துக்கொண்டு, “யாரிடம் வேண்டுமானாலும் சொல்லுங்கள், நாங்கள் எப்போதும் 50 ரூபாய் தான் வாங்குவோம்” என்று அலட்சியமாகப் பதிலளித்தது அங்கிருந்தவர்களை அதிர்ச்சியில் ஆழ்த்தியது.

இந்த விவாதம் நடந்துகொண்டிருந்தபோது சக பயணிகள் அனைவரும் அமைதியாக வேடிக்கை பார்த்தார்களே தவிர, யாரும் அந்தப் பயணியுடன் இணைந்து குரல் கொடுக்கவில்லை. ரயில்களில் அதிக விலைக்குப் பொருட்கள் விற்கப்படுவது இப்போது ஒரு ‘சாதாரணமான’ விஷயமாக மாறிவிட்டதோ என்ற கவலையை இந்தச் சம்பவம் ஏற்படுத்துகிறது. இத்தகைய சட்டவிரோதக் கூடுதல் கட்டணங்களுக்கு எதிராகப் பயணிகள் விழிப்புணர்வுடன் இருப்பதும், அதிகாரிகளிடம் புகார் அளிப்பதும் மட்டுமே இதுபோன்ற முறைகேடுகளைத் தடுக்க உதவும்.