கர்நாடக மாநிலம் குடகு மாவட்டத்தைச் சேர்ந்த 21 வயது கல்லூரி மாணவர், பெண்களின் ஆபாச வீடியோக்களை சமூக வலைதளங்களில் பரப்பிய குற்றத்திற்காகக் கைது செய்யப்பட்டுள்ளார். பெங்களூரில் பிபிஏ பயின்று வரும் முகமது சவாத் என அடையாளம் காணப்பட்ட அந்த மாணவர், வெவ்வேறு சமயங்களில் இரு பெண்களுடன் பாலியல் செயல்களில் ஈடுபடுவதைத் தாமாகவே வீடியோ பதிவு செய்துள்ளார். இந்த வீடியோ கிளிப்புகள் வாட்ஸ்அப் உள்ளிட்ட தளங்களில் பரவியதையடுத்து, குடகு மேம்பாட்டுக் குழுவின் தலைவர் எம்.எஸ். பிரசன்னா பட் அளித்த புகாரின் அடிப்படையில் காவல்துறை இந்த அதிரடி நடவடிக்கையை எடுத்துள்ளது.
இந்த விவகாரம் தொடர்பாக ஜனவரி 22 அன்று வழக்குப்பதிவு செய்த மடிகேரி கிராமப்புற காவல்துறை, பாரதிய நியாய சன்ஹிதாவின் (BNS) பிரிவு 79 (பெண்ணின் கண்ணியத்தை அவமதித்தல்), 294 (ஆபாசப் பொருட்களை விற்றல்) மற்றும் தகவல் தொழில்நுட்பச் சட்டத்தின் கீழ் நடவடிக்கை எடுத்துள்ளது. விசாரணையில் வீடியோவில் இருந்த நபர் முகமது சவாத் என்பது உறுதி செய்யப்பட்டது. தற்போது அவர் நீதிமன்றக் காவலில் வைக்கப்பட்டுள்ள நிலையில், இந்த வீடியோக்கள் எவ்வாறு கசிந்தன மற்றும் இதில் வேறு யாருக்காவது தொடர்பு உள்ளதா என்பது குறித்து குடகு மாவட்ட காவல்துறை தீவிர விசாரணை நடத்தி வருகிறது.