ஆந்திர மாநிலம் திருப்பதி கிராமப்புற காவல் எல்லைக்குட்பட்ட அவிலாலா பகுதி ஆந்திரா கிராமீணா வங்கியில் பெண் ஒருவர் தான் அடமானம் வைத்திருந்த 60 கிராம் தங்க நகையைப் புதுப்பிப்பதற்காக வந்துள்ளார். நகையைச் சரிபார்த்த நகை மதிப்பீட்டாளர், கவனக்குறைவாக அந்த நகையை மேசையிலேயே மறந்து வைத்துவிட்டுச் சென்றுள்ளார்.
அப்போது அங்கு நின்றுகொண்டிருந்த மர்ம நபர் ஒருவன், நைஸாகத் தனது கையிலிருந்த செய்தித்தாளை நகையின் மீது வைத்து மறைத்து, யாருக்கும் சந்தேகம் வராத வகையில் 60 கிராம் தங்க நகையை அப்படியே ஆட்டையை போட்டுத் தப்பியோடியுள்ளான்.
நகையைக் காணாமல் அதிர்ச்சியடைந்த வங்கியின் மேலாளர் கிரீஷ் குமார், திருப்பதி ரூரல் காவல் நிலையத்தில் உடனடியாகப் புகார் அளித்தார். வங்கியின் புகாரின் பேரில் சப்-இன்ஸ்பெக்டர் ஸ்ரீராம் வழக்குப் பதிவு செய்து, வங்கியில் உள்ள சிசிடிவி காட்சிகளைக் கைப்பற்றி நகையைத் திருடிச் சென்றக் காவாலியைத் தீவிரமாகத் தேடி வருகிறார்.