சென்னை சௌகார்பேட்டையில் மீன் வண்டி ஓட்டுநராகப் பணியாற்றி வந்த திண்டிவனத்தைச் சேர்ந்த முருகன் (54), புளியந்தோப்பு சுந்தரபுரம் 2-வது தெருவில் தனது மனைவியுடன் வசித்து வந்தார். கடந்த செப்டம்பர் 9-ஆம் தேதி மதியம் வேலை முடிந்து வந்த முருகன், தனது வண்டியைத் தெருவில் நிறுத்தியுள்ளார்.
அப்போது அதே பகுதியில் மீன் வண்டி ஓட்டும் ஜான்சன் (53) என்பவரும் தனது வண்டியை அங்கு நிறுத்த முயன்றபோது, மதுபோதையில் இருவருக்கும் இடையே கடுமையான பார்க்கிங் தகராறு ஏற்பட்டுள்ளது. இதில் ஆத்திரமடைந்த ஜான்சன், முருகனைத் தாக்கியதில் அவருக்கு தலையில் பலத்த காயம் ஏற்பட்டது. மறுநாள் காலை கடுமையான தலைவலி காரணமாக ஸ்டான்லி அரசு மருத்துவமனையில் அனுமதிக்கப்பட்ட முருகனுக்கு மண்டை ஓடு உடைந்திருப்பது கண்டறியப்பட்டு தீவிர சிகிச்சைப் பிரிவில் அறுவை சிகிச்சை செய்யப்பட்டது.
இச்சம்பவம் குறித்து ஏற்கனவே கொலை முயற்சி வழக்குப் பதிவு செய்து ஜான்சனைக் கைது செய்திருந்த பேசின் பிரிட்ஜ் காவல்துறையினர், சிகிச்சை பலனின்றி முருகன் வியாழக்கிழமை உயிரிழந்ததைத் தொடர்ந்து, இவ்வழக்கைக் கொலை வழக்காக மாற்றி ஜான்சனைச் சிறையில் அடைத்தனர்.