சண்டையா போட்டீங்க?… இருங்க வர்றேன்… ஆசிரியர் செய்த கில்லாடி ஐடியா… மாணவர்களை நொடியில் ஒன்று சேர்த்த மேஜிக்… இணையத்தை கலக்கும் வைரல் வீடியோ…!

சீனாவின் பீஜிங்கில் உள்ள ஒரு பள்ளியில் படிக்கும் இரு சிறு வயது மாணவர்களுக்கு இடையே சண்டை ஏற்பட்டுள்ளது. இதனால் கோபமடைந்த இருவரும் ஒருவருடன் ஒருவர் பேசாமல், ஒருவரையொருவர் தவிர்த்து வந்துள்ளனர். மாணவர்களுக்கிடையே நீடித்த இந்த மோதலைக் கவனித்த அவர்களின் ஆசிரியர், இருவரையும் மீண்டும் சமாதானப்படுத்தி நண்பர்களாக்க ஒரு சமயோசிதமான வழியைக் யோசித்தார்.

அதன்படி, ஆசிரியர் ஒரு சிறிய மரப்பலகையைக் கொண்டுவந்து, இரு மாணவர்களையும் அதன் மீது நேருக்கு நேர் பார்த்து நிற்க வைத்தார். “பலகையிலிருந்து கீழே விழாமல் நிற்க வேண்டும்; இதில் யார் நிலைதடுமாறி முதலில் தவறுகிறார்களோ, அவர்கள் மற்றவரிடம் மன்னிப்பு கேட்க வேண்டும்” என்ற நிபந்தனையையும் விதித்தார். ஆனால், ஆரம்பத்தில் கோபத்தில் இருந்த இருவரும் ஒருவரையொருவர் பார்க்காமல் எதிரெதிர் திசையை நோக்கியபடியே நீண்டநேரம் பிடிவாதமாக நின்றுகொண்டிருந்தனர்.

சூழ்நிலையை மாற்ற நினைத்த ஆசிரியர், மாணவர்கள் நின்றிருந்த மரப்பலகையை லேசாக ஆட்டினார். இதனால் நிலைதடுமாறி கீழே விழப் பயந்த இரு மாணவர்களும் சட்டென்று ஒருவரை ஒருவர் இறுக்கமாகக் கட்டியணைத்துக் கொண்டனர். அந்த கணத்தில் தங்களின் கோபத்தை மறந்து சிரித்த மாணவர்கள், உடனடியாகக் கட்டிப்பிடித்து மீண்டும் நண்பர்களானார்கள். ஆசிரியரின் இந்தச் சமயோசித யோசனையைச் சுற்றி நின்ற சக மாணவர்களும் கைதட்டி வரவேற்றனர்.