ராமச்சந்திரா உன் அரசியல் சின்னத்த என் முகத்துல காட்டாத… சீரிய எம் ஆர் ராதா… கடைசியில் எடுக்கப்பட்ட முடிவு!

தமிழ் சினிமாவில் தனக்கு முன்னோடி இல்லாத நடிகர்களில் ஒருவர் எம் ஆர் ராதா. தன்னுடைய தனித்துவமான நடிப்பால் ரசிகர்களைக் கவர்ந்தவர். மேடை நாடகத்தில் முடி சூடா மன்னனாக விளங்கியவர். 1930 மற்றும் 40 களிலேயே சில படங்களில் நடித்தாலும், நாடகம் அளவுக்கு அவருக்கு சினிமா பிடிக்கவில்லை. அதனால் நாடகங்களிலேயே கவனம் செலுத்தினார்.

அதன் பிறகு பத்தாண்டுகளுக்குப் பிறகு 1954 ஆம் ஆண்டு ரத்தக் கண்ணீர் திரைப்படத்தின் மூலம் மீண்டும் சினிமாவுக்கு வந்தார். அந்த படம் மிகப்பெரிய வெற்றிப் படமாக அமைந்தது. அதன் பின்னர் அவருக்கு குணச்சித்திர நடிகராக மிகப்பெரிய பெயர் வாங்கிக் கொடுத்த படம் என்றால் அது சிவாஜியோடு அவர் இணைந்து நடித்த ‘பாகப்பிரிவினை’ திரைப்படம்தான். அந்த படத்தில் சிங்கபூரான் என்ற வேடத்தில் கலக்கி இருப்பார் ராதா. ராதாவை நம் படத்தில் போட்டால் அவரே நகைச்சுவை மற்றும் வில்லத்தனம் என இரண்டையும் பார்த்துக்கொள்வார் என அவரை எல்லா படத்திலும் புக் பண்ண ஆரம்பித்தனர்.

எம் ஜி ஆர் மற்றும் சிவாஜி ஆகிய இருவரும் தமிழ் சினிமாவில் இருபெரும் நடிகர்களாக உருவாகி வந்த காலத்தில் கூட அவர்களுக்காக பணிந்து போகாதவர் எம் ஆர் ராதா. இருவரும அவரை மரியாதையோடு “அண்ணே” என்றுதான் அழைப்பார்கள். அப்படி இருந்த நிலையில் ஒருநாள் எம் ஜி ஆரோடு எம் ஆர் ராதா முரண்பட வேண்டிய சூழல் உருவாகியுள்ளது.

தொழிலாளி என்ற படத்தில் ஹீரோவான எம் ஜி ஆர் “கூட்டுறவு பஸ் சர்வீஸ்தான் நமக்கு வெளிச்சம் தரும் நம்பிக்கை நட்சத்திரம்” என்ற வசனத்தைப் பேசவேண்டும். ஆனால் அதில் நம்பிக்கை நட்சத்திரம் என்பதற்கு பதிலாக திமுகவின் சின்னமான உதயசூரியன் என பேச அந்த ஷாட் முடியும் போது வில்லனான எம் ஆர் ராதா முகத்தில் முடிந்துள்ளது.

அதனால் கோபமான ராதா “ராமச்சந்திரா நீ உன் கட்சி சின்னத்த என் முகத்துல காட்டாத, பேப்பர்ல இருக்குற மாதிரி நம்பிக்கை நட்சத்திரம் என்றே பேசு” என சீரியுள்ளார். இதனால் குழப்பம் நிலவ, கடைசியில் ஷாட் எம் ஆர் ராதா முகத்தில் முடியாமல் சுவரில் இருக்கும் கடவுள் படத்தின் மேல் முடிவது போல மாற்றி எடுத்தார்களாம்.