“என் காதலியை இங்கே வரச்சொல்லுங்க” இல்லன்னா இங்கே இருந்து குதிச்சிருவேன்… 6 மணி நேரம் போலீஸாரையே அதிரவைத்த காதல் பைத்தியம்..!!

பீகார் மாநிலம் முசாபர்பூரில் காதல் விவகாரத்திற்காக இளைஞர் ஒருவர் அரங்கேற்றிய ‘ஹை வோல்டேஜ்’ நாடகம் அப்பகுதியில் பெரும் பரபரப்பை ஏற்படுத்தியுள்ளது. தனது காதலியை நேரில் வரவழைக்க வேண்டும், இல்லையென்றால் மேலிருந்து குதித்துத் தற்கொலை செய்துகொள்வேன் என்று மிரட்டல் விடுத்தபடி, அந்த இளைஞர் சுமார் 300 அடி உயரமுள்ள மொபைல் டவர் மீது ஏறியுள்ளார். இதனால் அதிர்ச்சியடைந்த பொதுமக்கள் மற்றும் போலீசார் அங்கு திரண்டனர்.

சுமார் 6 மணி நேரத்திற்கும் மேலாக இந்த உயர்மட்ட நாடகம் நீடித்தது. அந்த இளைஞரே காவல்துறைக்கு போன் செய்து, “என் காதலியை இங்கே வரச்சொல்லுங்கள், அவர் வந்தால் தான் நான் கீழே இறங்குவேன்” என்று பிடிவாதம் பிடித்துள்ளார். காவல்துறையினர் மற்றும் அதிகாரிகள் எவ்வளவோ கெஞ்சியும், பேச்சுவார்த்தை நடத்தியும் அவர் இறங்கி வர மறுத்துவிட்டார். ஒரு கட்டத்தில் அந்த இளைஞரின் உயிருக்கு ஆபத்து ஏற்பட்டுவிடுமோ என்ற அச்சத்தில் அதிகாரிகள் திணறினர்.

இறுதியில், அந்த இளைஞரின் தாயார் சம்பவ இடத்திற்கு வரவழைக்கப்பட்டார். தனது மகனின் உயிரைக் காப்பாற்ற அவர் விடுத்த உருக்கமான வேண்டுகோள் மற்றும் கண்ணீர் போராட்டத்திற்குப் பிறகு, அந்த இளைஞரின் மனம் மாறியது. தாயின் பாசத்திற்கு அடிபணிந்து அவர் பாதுகாப்பாகக் கீழே இறங்கி வந்தார். காதலுக்காகத் தன் உயிரையே பணையம் வைக்கும் இத்தகைய செயல்கள், இது காதலா அல்லது எல்லை மீறிய பைத்தியக்காரத்தனமா என்ற கேள்வியை சமூகத்தில் எழுப்பியுள்ளது.