திருவள்ளூர் மாவட்டம் பொன்னேரி அரசு மருத்துவமனையில் தற்காலிக கணினி ஆபரேட்டராகப் பணியாற்றி வரும் ராஜேஸ்வரி (36) என்பவருக்கும், மாதவரத்தைச் சேர்ந்த பிரகாஷ் என்பவருக்கும் கள்ளக்காதல் இருந்து வந்துள்ளது. பிரகாஷின் மனைவி உயிரிழந்த பின்னரும் இருவரும் பழகி வந்த நிலையில், சமீப காலமாகப் பிரகாஷுடனான தொடர்பை ராஜேஸ்வரி துண்டித்துள்ளார். இதனால் ஆத்திரமடைந்த பிரகாஷ், பணி முடிந்து வெளியே வந்த ராஜேஸ்வரி மீது பெட்ரோலை ஊற்றி கொடூரமாகத் தீ வைத்துள்ளார்.
உடலில் தீப்பற்றி எரிய அலறியபடி மருத்துவமனைக்குள் ஓடிய ராஜேஸ்வரியை மீட்டு, சென்னை ஸ்டான்லி அரசு மருத்துவமனைக்குத் தீவிர சிகிச்சைக்காக அனுப்பி வைத்தனர். தப்பியோடிய குற்றவாளியைப் பிடிக்க போலிஸ் தனிப்படை அமைக்கப்பட்ட நிலையில், பொன்னேரி சுடுகாடு அருகே பதுங்கியிருந்த பிரகாஷைப் போலிஸார் வளைத்துப் பிடித்தனர். அப்போது அவன் சப்-இன்ஸ்பெக்டர் தமிழரசனை அரிவாளால் வெட்டித் தப்ப முயன்றுள்ளான்.
இதையடுத்து, பொன்னேரி காவல் ஆய்வாளர் சிவக்குமார் தற்காப்பிற்காகத் தனது துப்பாக்கியால் பிரகாஷின் காலில் சுட்டு அதிரடியாகக் கைது செய்தார். போலிஸாரைத் தாக்கிய காவாலி துப்பாக்கிச் சூட்டில் பிடிபட்ட இச்சம்பவம் பொன்னேரி பகுதியில் பெரும் பரப்பரப்பையும் அதிர்ச்சியையும் ஏற்படுத்தியுள்ளது.